Update - 65
____________________
Agli subah gulfam ali ke bangle me achanak hadkamp sa mach gaya. Gulfam apne room me apni dusri biwi nilofer ke sath soya hua tha. Ekdam se jab kisi ne uske room ka darwaza peetna shuru kar diya to dono hi hadbada kar uth baithe. Nilofer ne fauran hi apni nighty ko samhaalte huye jab darwaza khola to baahar sadia ke sath sath zafar ki biwi nadia ko bhi khade paya. Dono ke hi chehro par dukh aur santaap ke bhaav gardish kar rahe the. Aankho se aansu bah rahe the.
"Kya hua aapi?" Nilofer ne apni sautan sadia ki taraf dekhte huye puchha____"Aap dono ki aisi haalat kyo hai?"
"Gazab ho gaya neelu gazab ho gaya." Sadia buri tarah rote huye bol padi_____"Hamara sab kuch khatm ho gaya. Ham kahi ke nahi rahe."
Sadia ki baat sun kar nilofer sannate me aa gayi. Use samajh me to nahi aaya tha lekin itna wo zarur samajh gayi thi kuch bura ho gaya hai warna sadia aur uski bahu nadia is tarah roti nahi. Abhi nilofer kuch bolne hi wali thi ki pichhe se gulfam bhi aa gaya. Gulfam ne sadia ki baate sun li thi aur wo bhi andar se ghabra gaya tha.
"Kya baat hai?" Gulfam ne dhadkate dil se puchha_____"Aur aur tum is tarah kyo ro rahi ho?"
"Wo a...asad." Sadia sisakte huye boli____"Hamara asad apne kamre me nahi hai."
"K..kya matlab?" Gulfam buri tarah chaunka, haklaate huye bola____"N..nahi hai?? Iska kya matlab hua?"
"Wo le gaya use." Sadia aur bhi zoro se ro padi_____"Wo kamina hamare asad ko le gaya. Wo use bhi mere bete zafar ki tarah maar daalega. Khuda ke liye use bacha lijiye."
Gulfam ke sir par maano asmaan gir pada. Use aisa laga jaise abhi wo chakkar kha kar gir padega. Usne khud ko badi mushkil se samhala. Dilo dimaag me dhamake se hone lage the. Zahen me bijli ki tarah vikram ka naam goojne laga tha.
"Y..ye tum kya kah rahi ho sadia?" Gulfam ko jaise yakeen hi nahi hua tha is liye puchha_____"Asad apne kamre me nahi hai to zarur bathroom me hoga wo."
"Nahi....wo kahi nahi hai." Is baar nadia bhi rote huye bol padi____"Maine aur ammi ne pure bangle me use khoj liya hai. Wo yaha kahi nahi hai. Main jab dubara uske kamre me gayi to achanak hi meri nazar ek kaagaj par padi. Us kaagaj me jo kuch likha tha usi se pata chal gaya ki mere bete ko wo le gaya hai."
"K..kaagaj??" Gulfam ke maathe par shikan ubhar aayi, bola_____"Kaisa gaalaj mila hai tumhe? Dikhaao zara mujhe."
Gulfam ke kahne par sadia ne fauran hi apne hath me liya ek kaagaj ka tukda uski taraf badha diya. Gulfam ne us kaagaj ko le kar use khola aur us par likhe majmoon ko padhna shuru kar diya.
Likha tha_____'Kaise ho dear uncle?? Ummid karta hu behtar hi hoge. Well soch soch ke pareshaan to bahut hoge ki itni security ke bavjood main tumhare bangle ke andar ja kar bina kisi problem ke tumhare pote ko kaise uda le gaya? To sochte raho uncle....main to bas yahi kahuga ki main wo kar guzarta hu jiski tum jaise log kalpana bhi nahi kar sakte. Khair ab mudde ki baat suno aur wo ye hai ki agar tum chaahte ho ki tumhare bete ki tarah tumhara pota bhi mere hatho jaan se na mara jaye to ab is khel ko yahi par khatam karo. Waise tumhari jankari ke liye bata du ki main chaahta to bahut pahle hi tum jaise chuho ko bilo se nikaal kar jahannum me bhejne ka saadhan bana deta magar maine aisa nahi kiya. Janate ho kyo? Kyoki mujhe apne dam par aur apni kabiliyat par tum sabko jahannum bhejna tha. Tum sabne to bahut zor laga liya lekin ab meri baari hai. Main seena thok kar tumhare saamne aauga aur tumhe jahannum bhejunga. Agar khud ko mere kahar se bacha sako to bacha ke dikhaao. Ek baat aur, asli mard ho to apne dam par hi mujhse takrana. Apne kutto ka sahara lene ka sochna bhi mat. Agar aisa kiya to apne pote ki bhayankar maut ke tum khud hi jimmedaar hoge....achha ab alvida, jaldi hi mulakaat hogi.'
Gulfam kaagaj me likhe majmoon ko padh kar sach me sannate me aa gaya tha. Uska zahen sach me sochne laga tha ki itni security ke bavjood vikram uske bangle se uske pote ko kaise itni asaani se le gaya hoga. Usne bahut socha magar jawaab nahi soojha use. Udhar uski dono biwiya aur bahu roye ja rahi thi. Usne kisi tarah un sabko shaant kiya aur wada kiya ki wo asad ko kuch nahi hone dega.
Dilo dimaag me aandhi tufaan liye wo muda aur kamre ke attach bathroom me ghus gaya. Kuch der baad wo fresh ho ke nikla aur apne kapde wagaira pahanne laga.
[][][][][][]
Rahasyamay byakti ne diwaar par lage switch ka ek button dabaya to agle hi pal ajeeb si awaaz ke sath diwaar me ek darwaza pragat ho gaya. Us darwaze se wo jaise hi andar daakhil hua to andar ek madhyam size ke kamre me rakhi revolving chair par baithe shakhs ko dekh kar buri tarah uchhal pada. Kamre me LED bulb ki roshni thi. Udhar wo shakhs rahasyamay shakhs ko dekh kar bade hi jandaar tarike se muskura utha.
"T...tum yaha???" Rahasyamay shakhs maare baukhlahat ke hakla sa gaya tha. Naqaab ke andar se chamak rahi uski chamkili aankhe ashcharya se fati huyi thi.
"Kya kare dear uncle." Revolving chair par baithe shakhs ne yaani ki maine gahri muskaan ke sath kaha_____"Aaj kal ajeeb bimaari ho gayi hai mujhe. Aisi aisi jagah pahuch jata hu jaha pahuchne ki maine khud ummid nahi ki hoti. Khair chhodo zara ye to bataao ki sanstha ka chief mujhe yaha dekh kar apna hosh kaise gawa baitha?"
"K..kya matlab??" Rahasyamay byakti buri tarah hadbada gaya.
"Matlab ye ki mujhe yaha dekhte hi sanstha ka chief ye bhool gaya ki use saamne wale se apni real awaaz me baat nahi karni hoti hai." Maine chair par baithe baithe hi uski taraf dekhte huye kaha_____"Ye hosh gawa dene ka hi nateeja hai ki tumne mujhse apni real awaaz me baat ki aur apna bhed mere saamne itni asaani se khol diya."
Meri baat sun kar rahasyamay byakti fauran kuch bol na saka. Shayad ab use dhyaan aaya tha ki usse kitni badi galti ho gayi hai. Apni chamkili aankho se wo mujhe hi ghoore ja raha tha.
"Kitni maje ki baat hai na dear uncle ki sanstha ka chief mere saamne is wakt bahut hi lachaar aur bebas sa khada nazar aa raha hai." Maine uski chamkili aankho me dekhte huye kaha tha.
"Ye tumhari bhool hai." Rahasyamay byakti ne is baar apni ajeeb si awaaz me gurraya_____"Main ye maanta hu ki mujhe yaha par tumhare hone ki zara bhi ummid nahi thi lekin iska matlab ye nahi hai ki main is sabse bebas ya lachaar ho gaya hu."
"Oh aisa hai kya?" Main ekdam chair se uth kar uske behad kareeb ja kar bola_____"To fir dikhaao ki sanstha ke chief me kitni taakat hai aur wo apni taakat ke balboote par mera kya ukhaad leta hai."
Meri baat sun kar chief ek baar fir se kuch bol na saka. Mujhe apne itne kareeb dekh wo do kadam pichhe hat gaya tha. Wo mujhe hi dekhe ja raha tha. Apne itna kareeb hone se maine saaf mahsoos kiya ki naqaab ke andar uske chehre par dher saara pasina ubhar aaya tha jo uski chamkili aankho ki palko par boond ke roop me atka hua dikh raha tha.
"Ab ye naqaab utaar do gulfam uncle." Maine muskurate huye kaha_____"Ye sach hai ki mujhe pahle pata nahi tha ki is sanstha ka chief kaun hai magar haan andaza zarur lagata tha. Khair aaj to tumne khud hi zaahir kar diya ki chief tum hi ho is liye ab mujhse parda rakhne ka koi faayda nahi hai. Dusri baat, tumhare samajhne ke liye yahi kaafi hai ki main yaha aisi jagah maujood hu jaha koi bhi baahari insaan khwaab me bhi nahi aa sakta. Isi se zaahir hai ki maine ab tak bahut kuch aisa kar diya hoga jiske chalte tumhara mujh par koi zor nahi chal sakta."
"Waakayi." Rahasyamay byakti yaani ki gulfam ne apne chehre se naqaab utaarte huye apni real awaaz me kaha_____"Main behad hairaan hu ki tum is jagah par kaise pahuch gaye? Ye koi aisi baat nahi hai jo chutkiyo me ho jayegi. Mere pote asad ko bhi tumne mere bangle se utha liya jabki waha par had se zyada security thi. Aakhir kaise kar liya ye hairatangez karnama? Kya tarun ki help se?"
"Shayad tumne mere dwara likhe us majmoon ko thik se nahi padha hai uncle." Maine kaha_____"Jisme maine likha tha ki main sab kuch apne dam par aur apne balboote par karna chaahta tha. Mujhe kisi ke sahare ki zarurat nahi hai. Asli mard aur asli sher apne dam par hi shikaar ke liye nikalta hai."
"Chalo maan liya." Gulfam ne paas hi rakhi ek dusri chair par baithte huye kaha_____"To fir bataao kaise kiya ye sab?"
"Iska matlab tum abhi tak soch nahi paaye." Maine muskurate huye kaha_____"Sochoge bhi kaise? Insaan utna hi to soch pata hai jitni usme kshamta hoti hai. Khair ye to tum bhi jaante ho ki is duniya me asambhav jaisa kuch bhi nahi hai. Har cheez ka koi na koi tod aur koi na koi samadhaan zarur hota hai. Zarurat hai to bas dimaag lagane ki aur himmat dikhane ki. Maine wahi kiya hai. Do din pahle maine tumhara pichha kiya tha. Pichha karne se hi mujhe pata chala ki shahar ke bahaar bane us farmhouse se tumhara khaas connection hai. Tumhara bhed usi din mere saamne khul gaya tha lekin deri ke chalte main 100% sure nahi hua tha. Khair tumhara pichha karte karte jab main farmhouse me aaya to main sanyog se aise kamre me direct pahuch gaya jaha par ek rahasyamay byakti apni aankho me chamkila eye lence laga raha tha. Us wakt mujhe shanka to huyi thi lekin puri tarah sure nahi ho sakta tha kyoki tumhare chehre par naqaab chadh chuka tha. Tumhe dekh kar mere andar ye janne ki dilchashpi paida ho gayi thi ki apna huliya badal kar ab tum kya karne wale ho? Is chakkar me main ye bhool gaya tha ki main to tumhara pichha karte huye yaha aaya tha aur mujhe tumhi ko khojna chahiye. Khair uske baad maine wo sab kuch dekha jo jo tum karte gaye. Surang me tum ek mini car se nikal gaye jabki mujhe paidal hi lamba safar karna pada tha. Kismat achhi thi ki main us surang ke raaste yaha tak pahuch hi gaya aur fir kuch koshisho ke baad main ye bhi jaan gaya ki yaha kya kya hota hai."
"Mere bangle me kaise pahuche?" Kuch palo ki khamoshi ke baad gulfam ne puchha_____"Kya waha par bhi tumne mera pichha kiya tha?"
"Nahi uski zarurat hi nahi thi." Maine lambi saans lete huye kaha____"Tumhare bangle ke andar jane ka ek gupt raasta hai jiske bare me tarun ne bataya mujhe."
"T..tarun ne???" Gulfam chaunka_____"Use kaise pata ho sakta hai?"
"Use tumhare bete zafar ne bataya tha." Maine muskurate huye kaha____"Halaaki ye aaj ki baat nahi hai balki barsho pahle ki hai lekin barsho pahle ki jankari ki vajah se mera faayda ho gaya. Main soch bhi nahi sakta tha ki tum logo ne aise aise secret raaste bhi bana rakhe hain. Khair pichhli raat jab tum sab soye huye the to main usi gupt raaste se tumhare bangle ke andar daakhil hua. Maine dekha tum apni dusri biwi nilofer ke sath chipke soye huye the. Maine badi asaani se tum dono ko chloroform dwara behosh kar diya aur fir darwaza khol kar asad ke kamre ki taraf badh gaya. Tarun ne bataya tha ki bangle ke andar asad ka kamra kis jagah par hai. Halaaki maine yahi ummid ki thi ki aise wakt me koi bhi apne kamre me akela nahi hoga magar main us wakt ye dekh kar muskura utha tha ki asad saari duniya se bekhar apne room me akela hi soya pada tha. Main samajh gaya tha ki tumne mujhse ye ummid bilkul bhi nahi ki hai ki main tumhare bangle me aa jaauga aur kisi ko yu utha le jaauga. Tabhi to sab ke sab befikri se soye huye the. Khair maine asad ko bhi chloroform se behosh kiya aur fir kaagaj me tumhare liye note likh kar asad ko le kar chalta bana. Yakeen maano main khud hairaan tha ki main itni asaani se tumhare bangle ke andar se tumhare pote ko kaise le ja raha hu? Khair uske baad main jis raaste se aaya tha usi raaste se chup chaap nikal gaya."
Meri baate sun kar gulfam kuch na bola. Uske chehre par gahan socho ke bhaav gardish karte nazar aa rahe the. Fir sahsa usme halchal huyi. Usne overcoat ki jeb se ek shigar nikala aur use jala kar uske kash lene laga.
"To ab kya irada hai tumhara?" Gulfam ne kaha____"Tumhare saamne ab sab kuch khul chuka hai aur main bhi nihattha baitha hu. Agar meri jaan lene aaye ho to le lo. Apne bete ki maut ke baad ab waise bhi jeene ki koi khwaaish nahi hai mujhe."
"Nahi dear uncle." Maine kathorta se kaha____"Tumhe jeena hoga. Apne bete ke sath sath apne pote ki maut ka gam bhi sahna hoga tumhe."
"Nahi nahi please." Gulfam ke chehre par dahshat ke bhaav ubhar aaye____"Us masoom ke sath kuch mat karna. Uska is sabse koi lena dena nahi hai. Use is sabke bare me kuch bhi pata nahi hai. Tumhare gunahgaar to ham the na. Baakiyo ko tumne maar diya, ab main bacha hu to mujhe bhi jaan se maar daalo."
"Kyo?? Tumhe apne bete ki maut ka badla nahi lena mujhse?" Maine uski taraf dekha____"Kya mere prati tumhare andar badle ki bhaavna nahi jaagrit huyi?"
"Beshak jaagi hai." Gulfam ne kaha____"Lekin usse hoga kya? Kya koi badla lene se waapas aa jayega? Nahi vikram, badle ki bhavna se sirf vinaash hota hai. Apne kho jate hain aur jeewan bhar ke liye dukh dard mil jate hain. Apne bete ki maut ka mujhe bhi dukh hai lekin main jaanta hu ki badle ki aandhi me kabhi kabhi wo pedh bhi ukhad jate hain jo jhukna bhi jaante hain aur jinka koi kasoor bhi nahi hota."
"Kya matlab hua is baat ka?" Maine na samajhne wale andaz se uski taraf dekha.
"Main jaanta hu ki tumhe meri baato par yakeen nahi hoga." Gulfam ne shigar ke dhuye ko ugalte huye kaha____"Magar ye sach hai ki tum pure sach se waakif nahi ho."
"Mujhe tum logo ka saara sach maloom hai." Maine aawesh me kaha____"Aur ye usi ka nateeja hai ki maine apne gunahgaaro ko jahannum bhej diya hai. Tumhara sach bhi jaanta hu. Mujhe pata hai ki tumne kis maksad se maya ko apna mohra bana kar mere paas bheja tha."
"Is baat se main inkaar kar bhi nahi raha." Gulfam ne kaha____"Lekin mujhe pura yakeen tha ki ek din tumhe uski asaliyat bhi pata chal jayegi. Baat sirf itni hi nahi hai vikram, balki baat kuch aisi hai jise tum na to soch sakte ho aur na hi samajh sakte ho."
"Kya tum mujhe apni begunaahi ka pramaad dene ka irada rakhte ho?" Maine use ghoora_____"Agar tum sochte ho ki tum apni begunaahi ke liye mujhe koi safaayi doge aur main maan luga to tum galat ho."
"Main tumhe kisi baat ki safaayi nahi de raha vikram." Gulfam ne gambheerta se kaha_____"Balki us sach se rubaru karana chaahta hu jisse tum waakif nahi ho."
✤༺✧༻✤
