Horror Haunted ~~ " Game Of Rings " {Trilogy End}

[harshit1890]

This is the story i wish to finish, with so many things left to write when things ended in XP. Due to shortage of time i couldn't able to keep up with this one. But i would love to write and finish this one, though i don't have any backup of this one and i tried a lot but couldn't get so i decided to write again. The update will not be regular but i will try my best.

Ye kahani un viewers aur readers ke liye hai jinhone is part ki pehli 2 kahani padi hai.

Part 3
Haunted ~~ " Game Of Rings ": https://drive.google.com/file/d/1BBJcARRETOs4eRBH1Bcnc0T2RVNgwO3M/view

Part 2
Haunted (Dead Evil Returns): https://drive.google.com/file/d/1R357AMjniQ5o1p2_Dtm6VxE-C8Knwf90/view

Part 1
HAUNTED ( TUJHE MEIN PYAR KARU...... PAR KAISE): https://drive.google.com/file/d/1s5vKjbkWDNW-TPD-yWsb-fH0CrVqLSBf/view

Thanks spritemathews For the link

 

[MOHD shahbaz]

Waiting for next update aapne kaha ki tha ki ab. Regular update doge

 

[GuptAbhishek]

Bhai de do yr update plzzz

 

[harshit1890]

Waiting for next update aapne kaha ki tha ki ab. Regular update doge

Bhai de do yr update plzzz

THoda intezar bhai log thoda important screenplay chal raha hai dusri story par isliye usme samay bahut jada lag raha hai yahan jaldi launtunga

 

[Naina]

 

[Naina]

" kese mili inspector ? " shreyas aur anshika police station mein baithe the. Chai table par rakhi is sard mausam mein thandi hoti jaa rahi thi.

" apke huliye ke mutabik humne apne khabriyun se puch-tach karwai tab hume ek aurat ke bare mein pata chala " Sharma jawab dekar chup hua.

" par vo aurat wahi hai jise aap dhund rahe vo keh pana mushkil hai " Ajay bol kar chup hua aur shreyas ke bolne ka intezar karne laga.

" kahan hai vo ? " shreyas kuch soch kar bola.

" isme thodi problem hai shreyas ji " sharma ki awaz mein ghambhirta jhalak rahi thi.

" Problem? kesi problem ? "

" Us budhi aurat jesa apne uska huliya bataya uske mutabik kafi logon ne use ilake mein dekha hai par koi nahi janta ki vo kahan rehti hai. Humne un sbhi jagah par khoja jahan vo dekhi gayi par kisi ko nahi pata vo kahan rehti hai " Sharma ki baat shreyas ko ajeeb lagi kyun ki agar vo mili nahi to use ye kyun kaha ki vo mil chuki hai. Aur agar vo nahi mili to kahani ka mujhse juda rishta kaun batayega.

" par " shreyas soch mein tha tab ajay ki baat sun kar vo apni soch se bahar aya " par hume ye bhi pata chala hai ki use hospital ki taraf jata dekha gaya hai jahan humne abhi tak check nahi kiya hai "

" Kesa hospital? " shreyas ne ajay ki taraf dekha jo sharma ko dekh raha tha mano usne batane ke liye mana kiya ho. " kesa hospital inspector sharma " shreyas ne sawal sharma se kiya. Sharma ek pal use dekhta raha aur phir usne batana shuru kiya.

" Ek mental asaylum jo takreeban 100 saal pehle angrezo ke samay banaya gaya tha lekin pichle 50-60 salon se vo khandar pada hai. Kehte hain us samay vahan koi hadsa hua tha puri building mein aag lag gayi thi. Khabron ke mutabik aag itni badhi aur bheesadh thi ki us waqt wahan maujud har insan us aag ki chapet mein akar mara gaya kisi ke bhi zinda hone ki koi khabar nahi thi. Uske baad " sharma yahan ruka, batate hue uska dil bhi zoron se dhadak raha tha.

" uske baad " anshika ke sawal par vo use dekhte hue bola.

" Uske baad wahan jo koi bhi gaya vapis nahi lauta. Kuch saal pehle us hospital ki marmat karne ka kaam chalu hone wala tha lekin na jane kya hua pehle din jo majdur wahan kaam karne gaye vo lapata ho gaye. Jab unhe khojne ke liye team bheji gayi to vo bhi kabhi vapis nahi ayi. Dhire-dhire logon ke bich baat badh gayi sabko ye lagne laga ki us jagah par bhoot-pret ka saya hai jo logon ko vapis nahi ane deti. Iske baad kayi log aur aye jo bhooton ko pakdne ka kaam karte hain aur unme se koi bhi zinda vapis andar se bahar nahi aya " sharma ne sans ikhati ki " vo jagah officially Haunted hai isliye vahan koi nahi jatta, hum bhi nahi "

" kahan hai vo hospital " shreyas sharma ki baat khatam hote hi bola.

" Sheher se thoda uppar pahadi par bana hai lekin aap vahan nahi jaa sakte vo jagah officially bandh hai aur vahan jana allowed nahi hai "

" par us aurat ko usi raste dekha gaya tha na jatte hue aur aap logon ne har jagah dekh liya hai sivai us jagah ke "

" lekin " sharma kuch bolta use pehle shreyas ne rok dia.

" Mujhe vahan jana hoga bhale hi vo jagah kesi bhi ho. Aap bas mere jane ka intezam kar dijiye "

" mei aisa nahi kar sakta ye jante hue ki vahan koi adrishye shakti hai jo logon ki zindagi chinn rahi hai " sharma ko phir shreyas ne rok dia.

" Ye kahani meri zindagi se kahin jada uppar hai shayad aap nahi samajh payenge. Is waqt mere liye us aurat ko dhundna jaruri hai aur kuch nahi "

" Par agar vo vahan nahi mili to ? " ajay ne phir wahi sawal kia.

" to phir agar wahan ki kahani sachi hai to mei vapis nahi lautunga " Dono uski baat sun kar hairan ho gaye. Koi kuch nahi bola aur phir shreyas uth kar bahar nikal gaya.

Subah ka mausam tha par thand apne pure jor par thi. Kohre ki chadar hawa ke sath behte hue mano kuch kehna cha rahi thi. Vo khada apni soch mein tha jab anshika uske sath aa khadi hui.

" mei bhi tumhare sath chalungi aur ye mera faisla hai " Usne ek pal anshika ki taraf dekha. Vo ye baat pehle se janta tha par phir bhi dil ki baat kehne se khud ko roka nahi.

" ek bar tumhe le jakar bahut dard de chuka hun aur agar is bar "

" us dard ne mujhe tumse milaya hai shreyas. Parchai hun ab to is zindagi ke sath hi jaungi " Usne shreyas ka hath tham liya. Pyar ka asli matlab tabhi samajh ata hai jab vo aise waqt mein sath ho jab tum sabse mushkil raste par chal rahe ho. Shreyas ne anshika ka hath majbuti se tham liya. Vishwas aur pyar ki kahani mein naya mod ane wala hai aur ye abhas shreyas ko man hi man hone laga tha.

Shreyas ne nazre piche ki jahan sharma aur ajay khade unhe hi dekh rahe the. Sharma jese shreyas ki ankhon ko padh chuka tha usne han mein sar hilaya aur shreyas apni manzil ki aaur chal pada.

Dhire-dhire hi sahi gaddi manzil ki taraf badh rahi thi. Khamoshi ne jaise unke dil mein ghar kar liya tha. Kareeb adhe ghante ke baad manzil unke samne thi. Hospital kafi badha tha. Jadatar har jagah ki deewarein kalli padh chuki thi aur kai jagah se tut bhi raha tha. Main gate par bada sa board laga tha aur vo band tha. Baarish se board par bhi jang lag chuki thi.

" mei gate kholta hun " shreyas ne gaddi ka darwaja khola aur apne kadam zameen par rakh diye. Hawa ki awaz uske kano mein padh rahi thi. Vo gate ke nazdeek aya aur board padne laga jo gate par laga hua tha.

" Is jagah par asadharan ghatividuyun ke hone ka anuman hai. Jagah surakshit na hone ke karan bandh kar di gayi hai. Andar jana mana hai. Rasta band hai vapis jaiye " shreyas board padh raha tha ki eka-ek uski nazar hospital ki building ke sishe par gayi. Jiske piche koi tha jo usi ki taraf dekhta hua hath mein ek toy liye sishe par apna sar zor-zor se maar raha tha. Shreyas ko pehle uska veham laga lekin phir usne thoda dhayan se dekha tab paya ki sach mein koi patient tha jo zor-zor se sar sishe par mar raha tha.

" shreyas "

" ehh.. ha.. " anshika ke kandhe par hath lagate hi vo chaunk pada.

" kya hua ? "

" vo " usne anshika se nazar hata kar us taraf vapis dekha to vahan kuch nahi tha. " kuch nahi "

" kab se awaz laga rahi thi. Koi hai ? " usne apni nazre band gate se idhar udhar ghumai par koi nahi dikha.

" nahi " usne gate ka lock khola aur use dhakka dekar khol dia. Uski awaz dono ko chubi aur kuch der vahan gunjti rahi. Dono gadi mein vapis ja baithe aur phir usne gaddi andar laa khadi ki.

" ajeeb si bechaini hai idhar " Anshika utarte hi boli. Shreyas ne koi jawab nahi dia kyun ki use bhi wahi mehsus hua tha. " mein andar jane ka rasta dekhta hun " Shreyas ne dhakka dekar jab hospital ka gate kholne ki kosish ki to vo khula nahi. Anshika abhi gadhi ke pas hi khadi thi.

" dono darwaje bandh hai fir aur agar vo budhi aurat yahan " shreyas building ke abhi us taraf hi gaya tha ki tabhi use " aaaahhhhhhhhh " anshika ki cheekh sunai di. " anshika " vo ghabrate hue vapis dauda.

kayi updates ke baad ab jaake kahani interesting mod li hain... superb...
jis topic par yeh series suru huyi thi uski fir se re-entry hone wali hai ?
Let's see what happens next
Brilliant update with awesome writing skill harshit ji....

 

[Naina]

Dono gaddhi se utare aur hospital ke darwaje ki tarafh badhe. Charon aur sukhi padi tehniyun ne gher li thi. " ajeeb si bechaini hai idhar " anshika ne shreyas jaisa hi mehsus kiya. Vo bina kuch bole anshika ka hath thame aage badha. Usne darwaja par dhakka diya par vo nahi khula.

" band hai " usne takat laga kar kholne ki kosish ki par vo nahi khula.

" shreyas kya pata rasta kahin aur se ho. Itni badhi jagah hai rasta us taraf se bhi ho sakta hai " usne ishara kiya.

" hmm " shreyas ko anshika ki baat sahi lagi. " theek hai tum yahin tehro mei dekh kar ata hun aur "

" chinta mat karo mujhe kuch nahi hoga " anshika ne shreyas ki baat puri ki. Shreyas anshika ko chhod kar dusri taraf chal pada. Maidan bahut badha tha vo ye sochte hue aage badha use ek aur gate dikha par vo bhi bandh tha. Khidki ki unchai zameen se uppar thi isliye vo vahan se bhi nahi jaa sakta tha. " Dono gate bandh hai to vo aurat yahan kese aati jati hogi. Aisa to nahi ki vo yahan ho hi nahi ? "

Anshika usi darwaje ke pas khadi thi ki tabhi use ek ahat sunai di. Vo koi awaz thi jo darwaje ke piche se aa rahi thi. Awaz sun anshika ka dil zoron se dhadkne laga vo darwaje ke pas ayi aur kaan laga kar dhayan se sunne lagi. Awaz bahut dhimi thi isliye uske liye samajh pana mushkil tha. Awaz jane ki jigasaya mein anshika ne hath se handle ko pakad kar niche kiya to vo ek awaz ke sath khul gaya. Khulte sath hi vo ek jhatke se piche hui. Darwaja thoda khul gaya tha, uske chehre par pareshani aur halka dar badha. Par sathi hi andar se ane wali awaz tez ho gayi. " kaun hai " uske muh se nikla aur vo ek kadam aage badhi. Aage badh kar usne darwaje ko dhakka dia aur vo ek ajeeb si awaz ke sath khul gaya. Samne corridor tha, roshni mein halka halka hi dikh raha tha lekin usk alawa vahan koi maujud nahi tha. Kisi ko na dekh vo aage badhi aur usne dusra darwaja bhi dhakka de kar khol dia. Vo thoda sa khula aur phir ruk gaya. Anshika ne apne hathon ke zor se use piche kiya lekin vo fir bhi piche nahi gaya. Jab vo piche nahi gaya tab uska dhayan usi awaz par vapis gaya jo theek usi darwaje ke piche se aa rahi thi. Dekhne ki jigasya mein usne intezar nahi kiya aur usne apne kadam andar rakhe. Uski sansein bahut tez ho gayi thi, kuch purani yadein taza hui phir bhi usne apni nazrein darwaje ke piche ghuma di.

Vahan ek ladki baithi apne baal kaat rahi thi usne apna chehra utha kar anshika ki taraf kia. Chehra bilkul safed tha aur ankhein ek dum nili mano din mein ek chudail uske samne baithi ho. Vo ladki use dekh kar hansi aur usi ke sath usne apni jali hui jaban bahar nikal di. Vo is pal ko dekhte hi chillai " aaaaaah--hhhhhhhhhhhhh "

Anshika ke chillane ki awaz sunte hi shreyas fauran vapis ane ke liye daudha. Vo bhagta hue anshika ke pass aya to dekha vo chillati hui piche ki taraf ho rahi thi.

" anshika "

" shreyas " vo uski bahon mein aagayi. " anshika kya hua " vo sawal karta use pehle uski nazar samne khule hue darwaje par gayi. Jo darwaja use khul nahi raha tha vo ab khula hua tha. Ye dekh shreyas samajh gaya ki hospital ki kahani sach hai. Uppar se anshika ka yun dara hua dekh vo aur ghabra gaya " anshika kya hua kya dekha tumne " usne anshika ko khud se alag kia.

" shreyas andar... vo ladki, vo bahut darwani thi shreyas " vo anshika ki ghabrahat saaf dekh raha tha.

" darne ki jarurat nahi mei hun tumhare sath " usne anshika ko bahon mein bhar liya. Dono kuch pal yun hi khade rahe aur jab use laga anshika theek hai tab usne use khud se alag kiya. " anshika tum theek ho " usne uska chehra tham lia.

" hmm "

" hospital ki kahani sachi lagti hai. Mei chahta hun tum vapis chali jao. Sham hone se pehle kuch nahi mila to mei vapis aa jaunga " vo ye baat police station mein hi kehna chahta tha.

" nahi agar is jagah mein kuch hai tum hum dono sath jayenge. Tum nahi the isliye dar gayi thi. Sath hote tab kisi bhi chiz ka dar nahi bhale hi vo koi bhatkati ruh hi kyun na ho " anshika apne faisle par adh chuki thi.

" par "

" pyar mein akela chhodna kahan likha hai shreyas. Tumhe umid hai ki vo budhi aurat yahin hogi ? " usne shreyas ki baat ko bich mein rok kar kaha.

" pata nahi anshika. Agar tumne kuch dekha hai to yahan jarur kuch hai aur aise mein vo aurat yahan kyun hogi ? " shreyas ka sawal sahi thi.

" bhulo mat vo aurat tumhare sapne mein ho rahi ghatnaon ki shakti ko pehchanti hai to kya pata vo yahan ki shaktiyun ko bhi janti ho " anshika ki baat sahi bhi ho sakti hai aur galat bhi. Agar wo budhi aurat itni takatwar hai to shayad vo mere sapnon ke bare mein bata paye. Shreyas bas isi soch mein tha ki vo andar jaye ya nahi kyun ki uske sath uske pyar ki zindagi judi thi. Par vo apne sapno ki hakikat janna chahta tha aur iske alawa koi aur rasta bhi nazar nahi aa raha tha.

" theek hai par dhayan rahe tum mera hath nahi chhodogi. Chahe jo bhi ho jaye " shreyas ki baat sun anshika ne hami bhari aur shreyas uska hath apne hath mein thame andar jane ke liye aage badha. Anshika andar ghusne se pehle halka ghabrai par shreyas ke ehsas ne usko darne nahi dia. Vo dono andar aa khade hue, andar ab vo ladki nahi thi jise anshika ne dekha tha. Barhal vahan koi bhi maujud nahi tha. Farsh par mitthi hi mitthi thi aur corridor ki us gehrai mein halki roshni ke sath ek andhera kayam tha.

Shreyas anshika ko lekar aage badha. Corridor ki mithi par badte dono ke kadam wahan ek lauti awaz thi. Vo dhire-dhire chalte hue aage badh rahe the. Dono ke sine mein ek ajeeb si khamoshi aur dar tha jo ek dusre ke liye tha. Samne kya hai Kuch bhi pata nahi chal paa raha tha aur aisa lag raha tha mano ye corridor kabhi khatam hi nahi hoga. Shreyas ne socha agar vo budhi aurat hogi to shayad is shanti mein uski awaz sun le isliye vo chillaya.

" koi hai " anshika ne uski taraf dekha. Uski sansein tez chal rahi thi. Uski awaz gunji par jawab mein kuch nahi aya vo ek baar phir chillaya " koi hai " aur is baar chillate hi pura corridor atmaon se bhar gaya jinki nazar un dono par hi thi. Koi doctor tha to koi pateint, koi zameen par baitha tha to koi chalta hua ruk kar unki taraf dekh raha tha. Ye dekhte hi anshika ne apna chehra shreyas ke sine mein chupa liya. Vo man hi man 'jai mata di' ka laap lene lagi. Shreyas ki nazar abhi samne khade doctor par thi jo ek patient ke sath tha aur eka-ek jab use mehsus hua ki ek nazar bilkul theek pass hi hai tab usne apni nazar us taraf ghumai. Vo ek bacha tha jo vahan uske badal mein baitha use hi ghur raha tha. Shreyas ne uska chehra dhayan se dekha, adha chehra jal chuka tha usme lage kide us jhakam par ghum rahe the. Shreyas ko apni taraf ghurta dekh vo bacha muskuraya jiske baad shreyas ki dil ki dhadkan aur tez ho gayi. Uske danton se khoon rista hua bahar girne laga. Vo janta tha anshika behad dari hui hai isliye usne anshika ka hath aur majbuti se pakad liya. Aur phir ek nazar piche ki aur dali jahan vo darwaja jise andar aye the vo bandh padha tha uske alawa piche bhi wahi atmayein maujud thi. Ek patient jo strecher par baitha use hi ghur raha tha. Uske hath per jale hue the aur vo apni niii ankhon se use hi ghur raha tha.

Achanak ek awaz hui jisne use dara dia aur usne apni nazar samne ki taraf kar li. Kuch hi duri par use kannch laga ek lakdi ka darwaja dikha jo shayad apne aap khula tha jiski awaz uske kano mein padhi thi. Vo sabhi atmayein shreyas ko hi dekh rahi thi. Vo ek baat samajh gaya tha isliye usne bina unki taraf dekhe anshika ko lekar dhire-dhire aage badhne laga. Use bas us darwaje tak pahunchna tha, jaise jaise vo aage badhta vo nili ankhein jo uske sath khadi thi vo use jata dekhti rahi. Aur phir vo us darwaje ke paar jaa khada hua.

wah kya baat hain welcome bhi ek bhutni ne kiya... btw wahan ke bhoot kaafi friendly hain...
Kahin woh nili ankhein us welcome karne wali ki to nahi joh inhe ghoor ke dekh rahi hai....
Khair let's see what happens next
Brilliant update with awesome writing skill harshit ji

 

[chintu222]

Kya update tha..maza aa gaya
Mujhe lagta hai tu horror stories hee mast likhta hai
Abb aayega kahani ka maza..yahan par toh aa gaye ye log..aur nili ankhon vali amma se mulakat bhi ho gayi...
Abb dekhte hai aakhir kon hai jani pehchani aurat
Waiting for nxt

 

[Naina]

" anshika " shreyas ke pukarne par anshika ne apna chehra sine se hata kar uske chehre ki taraf dekha. " tum theek ho " anshika ke chehre par abhi bhi dar tha.

" shreyas vo sab is halat mein, tumhe unki ankhon mein dekha kitna "

" khauf tha anshika, janta hun " shreyas ne charon taraf nazar failai. Ek Hall mein dono khade the jahan ek taraf desk laga tha aur uske samne tuta hua saman maujud tha.

" Hume andhera hone se pehle hi nikalna hoga pata nahi kaun sa mayajal hai yahan " shreyas ne ghadi mein dekhte hue kaha. Vo tute hue desk ke niche nazar dal kar dekhne laga. File padhi thi jo aag ki vajah se kali padh gayi thi. Usne file utha kar use khola. " Deceased Person " usme photo ke sath marne wale ka naam aur uski puri jankari likhi thi. Usne naam padha aur tasver dekhne laga par vo itni kharab ho chuki thi ki chehra dekh pana mushkil tha.

" lagta hai yahan lagi aag sach mein bahut bhayanak rahi hogi. " anshika ne jalne ki wajah se kali padh chuki deewaron ko dekhte hue kaha.

" hmm par building ke kanch ek dum sahi hai. Aksar itni bheeshad aag mein kanch tut jatte hain aur iske alawa kuch chizon ko koi nuksan nahi hua " usne lakdi ke darwaje ki aaur ishara kiya jise vo andar aye the. Khidkiyan band thi isliye uska andaza sahi ho sakta tha, salon pehle hue hadse ke piche kya sach tha ye janna uska maksad nahi tha.

" hmm ho sakta hai koi kahani yahan bhi maujud ho " anshika bolte hue chup ho gayi. Uski nazar deewar ke hisse par gayi. " mujhe lagta hai yahan kuch hai " anshika kali mithi ko hath se jhadne lagi. Shreyas ne file desk par rakhi aur anshika ke pas aya. Anshika ne hath se kaffi saaf kar dia tha.

" door " shreyas kanch se us paar sidiyan dekh paa raha tha. Door par koi handle nahi tha aur aag ki wajah se kalli ho jane ki vajah se vo deewar mein chup sa gaya tha. Shreyas ne use kandhe se todne ki kosish ki par vo nahi tuta. Tab usne usko do-teen laat mari tab usme crack ane laga. Jalne ki vajah se kamjor padh gaya tha isliye vo bich mein se tut gaya. Itna tut gaya ki vo dono vahan se nikal sakte the. Shreyas pehle khud bahar aya aur phir anshika ko bahar kiya. Samne sidiyan thi aur dono taraf corridor.

Shreyas ne coridor ke dono taraf dekha. " uppar chalein " sidiyan uppar aur niche dono taraf jaa rahi thi. Dono ne uppar jane ka faisla kiya. Sidyan chadte hue dono uppar pahunche par sidiyun par anshika ne shreyas ka hath pakad kar use rok dia. Sidyun ke samne desk ke piche ek aurat baithi thi.

" kya hua ? " shreyas ne fauran pucha.

" vo samne " anshika ki nazar ka picha karte hue shreyas ne samne dekha par use kuch nahi dikha. " kya hua anshika kaun hai samne "

" vo aurat shreyas " shreyas ne phir anshika se nazar hata kar samne dekha lekin use koi nahi dikha. Vo sochte hue fauran samajh gaya ki koi hai jo sirf anshika ko dikh raha hai par use nahi. Usne anshika ka hath pakda aur desk ke pas aa khada hua. Vahan koi maujud nahi tha lekin anshika ke liye vahan vo aurat baithi hui use ghurti hui muskura rahi thi.

" anshika mat dekho " shreyas ne anshika ko ek hi taraf dekhte hue paya. " anshika mat dekho uski taraf " usne anshika ko samjhaya par shayad vo un ankhon se nazre hata hi nahi paa rahi thi. " anshika " shreyas ne thodi unchi awaz mein kaha to vo ghabra kar uski taraf dekhne lagi. " ankhon mein mat dekho, vo ankhein hume akarshit kar rahi hai " shreyas ne anshika ko samjhaya to usne apni ankhein band kar li.

" jai mata di, jai mata di " usne apni ankh khol kar dubara desk ki taraf dekha to vahan kuch nahi tha. " chalo " vo anshika ka hath thame aage badha. Coridor mei jo pehla kamra tha vo usme ghuse aur shreyas ki nazar khidki par ja ruki. Vahan koi ruh thi jo apna sar sishe par mar rahi thi bar-bar, bar-bar.

" shreyas " anshika kuch kehti use pehle vo anshika ke sath bahar aa gaya. " mujhe nahi lagta yahan in ruh ke alawa kuch hai anshika " uski sans tezz chal rahi thi.

" hume fauran yahan se jana chahie, sham hone mein bas kuch hi samay bacha hai "

" shreyas lekin "

" Anshika mujhe malum hai ki tum mere liye pareshan ho par this place is dead. Gaon walon ki baat sach lagti hai. Ye ruh har jagah hai aur kaun si kitni khatrnak hai hume uske bare mein kuch nahi pata. Aur hume ye bhulna nahi chahie ki ye paglon ka asalyum tha " shreyas ne itna kaha ki corridor mei kisi ke hasne ki awaz ane lagi. Awaz aisi thi jese koi zor-zor se hans raha ho. " hhahahahhhhhhhhhaaaaaaaaaaaaaa aaaaaaaahhhhhhaahhh " vo badhi hi ajeeb tarah ke hasne ki awaz thi.

" we need to go now " vo anshika ko lekar sidiyun ki taraf badha aur dono tez kadmo se niche utarne lage par jese hi niche pahunche dono ke kadam ruk gaye aur anshika cheekh paddhi. " aaaahahhh "

Samne koi khada tha. Ek budhi aurat shayad dande ke sahahre se khadi thi. Safed baal jo usne sar par bandhe hue the, chehra adha jala hua, ek ankh kanni aur dusri ankh itni badi thi ki vo adhe se jada chehre se bahar nikal rahi thi. Ye ankh ka vo hissa tha jis hisse ka chehra jala hua tha. Baki bache chehre par chote-chote gadhe pade hue the. Uska chehra dekhte hi shreyas use dekhte hue baki bachi sidiyan utra aur uske samne ja khada hua. Vakai pass se vo dil-dehla dene wala chehra tha jise dekh koi bhi dar jaye. Shreyas kuch kehta use pehle vo bol padi.

" aa gaya tu kab se mei tera intezar kar rahi thi, kab se " vo awaz jaise jani pehchani thi. Shreyas ke man mein baba ki parchai aa gayi.

Kamal hain ye budhiya ab jaake samne aayi.. ab tak kya lukka chuppi khel rahi thi
Khamkha becharo ko pure asylum ghumati rahin... very bad budhiya
Khair.... ab yeh kis liye shreyas ke liye intezaar karne lagi... kahin...
Let's see what happens next
Brilliant update with awesome writing skill harshit ji.....

 

[Naina]

Intezaar agle update ke liye....

 

[harshit1890]

kayi updates ke baad ab jaake kahani interesting mod li hain... superb...
jis topic par yeh series suru huyi thi uski fir se re-entry hone wali hai ?
Let's see what happens next
Brilliant update with awesome writing skill harshit ji....

Han ab main part par hai kahani
Bhutia entry mein

Thanks naina ji