- 3,273
- 16,668
- 159
Ko To Rok Lo {Update - 0262}
____________________________
“Is baat ke liye mausa ji ne papa se kaha bhi tha ki, bado ke is faisle me tumse kuch puchhne ki ya tumhari sahmati lene ki kya jarurat hai. Magar papa ne unki baat nahi maani aur ye baat tumse puchh lene ko kaha tha.”
“Papa ki ye baat sunkar bua ji ne saaf kah diya tha ki, unhe papa ka bus me jaane ka faisla jara bhi bura nahi laga hai. Isliye iske baare me tumse kuch puchhne ki koi jarurat nahi hai. Lekin papa ne unki baat bhi nahi maani aur unhe hi aapse ye baat puchhne ke liye kah diya.”
“Sath hi aapko apna faisla sunane ke liye bhi kah diya tha ki, punnu ki baat sunne ke bad wo khud is baat me apna faisla suna de. Isliye bua ji ne aapse ye sawal kiya tha aur aapki baat sunkar apna faisla bhi suna diya tha.”
Ami ki is baat ko sunkar, mujhe yakin ho gaya ki, mera bap apne besir pair ki baton se sabki najro me mujhe bura banana chahta hai. Lekin wo aisa kyo kar raha hai, ye meri samajh me nahi aa raha tha.
Mere bap ne mere Mumbai aate jaate rahne ki baat par mausa ji (keerti ke papa) ko bhi bhadka ke rakh diya tha aur unhe mere khilaf le aaya tha. Aisa hi kuch wo humare durgapur jaane wali baat ko lekar kar raha tha.
Wo bina vajah ke humare durgapur jaane ke liye car ki jagah bus le jana chahta tha. Magar iske liye usne meri sahmati ko bich me daal diya tha. Lekin iske liye use meri sahmati nahi mil saki thi.
Mai janta tha ki, mera bap kitna bada kamina hai. Mujhe pura viswas tha ki, is samay mere bap ke dimag me mere khilaf koi sajish chal rahi hai. Jis vajah se wo mujhe sab taraf bura banane me tula hua tha.
Abhi mai papa ke baare me ye sab baten soch hi raha tha ki, tabhi mujhe mehul, keerti, neha aur nitika mere kamre me aate huye najar aaye. Unhe mere kamre me aate huye dekh kar maine keerti se kaha.
Mai bola “kya hua, tum log upar kyo aa gaye.”
Meri baat sunkar keerti ne kaha.
Keerti boli “niche wo aniruddha, niranjan aur manik aaye hai. Wo log mausa ji apni baten karne me lage hai. Aise me hum log waha baith kar kya karte. Isliye tumhare pas chale aaye.”
Keerti ki baat sunkar, maine kaha.
Mai bola “chalo, achi baat hai. Ye batao, hume yaha se nikalne me kitni der hai.”
Meri is baat ka jabab mehul ne dete huye kaha.
Mehul bola “durgapur yaha se dhai teen ghante ki duri par hai. Hum yaha se sham ko 5 baje niklege aur lagbhag sham 7:30 baje durgapur pahuch jayege.”
Mehul ki ye baat sunne ke bad, mai us se aniruddha, niranjan aur manik ke mobile number lene laga. Maine un teeno ke mobile number mehul se lekar apne mobile me save kiye. Iske bad maine mehul se kaha.
Mai bola “abhi hume yaha se nikalne me bahut samay baki hai. Humare sath keerti, neha, nitika bhi juhi didi ki shadi me ja rahi hai. Fir tu juhi didi ki shadi me shilpa ko lekar kyo nahi chal raha hai. Tujhe kam se kam ek baar to, us se humare sath chalne ke liye kahna chahiye tha.”
Meri baat sunkar, mehul ne kaha.
Mehul bola “maine shilpa se iske baare me puchha tha. Lekin usne khud juhi didi ki shadi me jaane se saaf mana kar diya. Isliye fir maine bhi use juhi didi ki shadi me chalne ke liye jor nahi diya.”
Mehul ki baat sunkar, keerti ne kaha.
Keerti boli “mai jab shilpa ko uske ghar chhodne gayi thi. Tab uski mummy ke samne hi maine shilpa se humare sath juhi didi ki shadi me chalne ko kaha tha. Lekin us ne shadi me jaane se saaf mana kar diya.”
Keerti ki baat sunkar, mujhe kuch ajib jarur laga. Lekin fir maine is baat ko ansuna karte huye keerti se kaha.
Mai bola “tum ek baar fir shilpa se baat karke dekho, shayad wo is baar tumhari baat maan jaye.”
Keerti boli “ok, mai abhi shilpa se baat karti hu.”
Ye kahte huye keerti ne shilpa ko call laga diya. Shilpa ne keerti ka call uthaya to keerti use juhi didi ki shadi me chalne ke liye manane lagi. Shilpa ko aakhir keerti ki baat manna padi.
Keerti ne shilpa ki mummy se baat karke shilpa ke juhi didi ki shadi me jaane ki sahmati le li. Jiske bad shilpa ne kaha ki, use apne shadi me chalne ki taiyari karne me jyada samay nahi lagega.
Wo jaldi hi shadi me chalne ki apni saari taiyari karke waha pahuch jayegi. Uske liye keerti ko pareshan hone ki jarurat nahi hai. Wo apni mummy ke sath waha pahuch jayegi.
Keerti ne use aunty ko pareshan karne se mana kiya. Lekin usne kaha ki, isme pareshani wali koi baat nahi hai. Mummy use waha chhod bhi degi aur aunty (chhoti maa) se mil bhi legi.
Taki mere shadi me jaane se mummy ko koi problem na rahe. Keerti ko bhi shilpa ki ye baat sahi lagi aur usne shilpa se jaldi aane ki kah kar call rakh diya. Iske bad keerti ne humse kaha.
Keerti boli “tum log yahi ruko, mai mausi ko shilpa ke bhi humare sath jaane ki bata deti hu.”
Keerti ki baat sunkar, maine keerti se kaha.
Mai bola “tu apne sath chhoti maa ke pas nitika ko bhi le ja. Chhoti maa se kahna ki nitika hi shilpa ko apne sath shadi me le jana chahti thi. Isliye tumne shilpa ko sath chalne ke liye taiyar kiya hai.”
Keerti aur nitika ko meri ye baat sahi lagi. Isliye keerti, nitika aur neha teeno niche chhoti maa ko shilpa ke bhi sath jaane ki baat batane chali gayi. Unke jaane ke bad maine mehul se puchha.
Mai bola “shilpa ke humare sath shadi me jaane se tu khush hai na.”
Meri baat sunkar, mehul ne aage bad kar, mujhe gale lagate huye kaha.
Mehul bola “abe ye kaisi baat kar raha hai. Tu bhai hai mera. Tune jo bhi socha hai, bilkul sahi socha hai. Mai shilpa ke humare sath jaane se bahut khush hu.”
Mehul ki baat sunkar, ami ne mehul se kaha,
Ami boli “bhaiya, aapko humare sath shilpa didi ke chalne ki asli khushi tab milti, jab vaani didi bhi humare sath rahti.”
Ami ki ye baat sunkar, mehul ne chaukte huye puchha.
Mehul bola “wo kyo.”
Ami boli “wo isliye ki, vaani didi, richa aunty ke samne aapki aur shilpa didi ki shadi ki baat kar leti.”
Ami ki baat sunkar, mehul ne hanste huye kaha.
Mai bola “baat to teri sahi hai, lekin kabhi bhool se bhi ghar me kisi bade ke samne is baat ka jikar mat karna. Abhi meri umar shadi ki nahi hai. Ghar ke saare log abhi meri shadi ke khilaf hi rahege.”
“Yadi vaani didi meri shadi shilpa se pakki karwana chahti hai to, ye vaani didi ka problem hai. Is mamle me hume nahi panda hai. Is shadi me jo bhi problem hogi, wo vaani didi khud hi dekh legi.”
“Waise bhi humari hitlar didi ke khilaf koi bhi jana pasand nahi karta hai. Isliye mai to bas is baat ka intejar kar raha hu ki, vaani didi kab meri shilpa ki shadi ki baat mummy papa ke samne aur baki sabhi bado ke samne rakhne wali hai.”
Mehul apni itni baat kah kar chup ho gaya. Magar uski in baton se uske man ki baat bhi samne aa gayi. Tabhi mera mobile bajne laga. Maine mobile dekha to, vaani didi ka call aa raha tha. Maine fauran call uthate huye kaha.
Mai bola “ji didi.”
Vaani didi boli “waha sab thik chal raha hai na.”
Mai bola “ji didi yaha sab thik hai. Hum log 5 baje yaha se durgapur ke liye nikal jayege.”
Vaani didi boli “good, tumhara mission thik to chal raha hai na. Tumhe koi problem to nahi hai na. ”
Mai bola “ji didi, yaha sab thik hai aur mujhe koi problem nahi hai.”
Vaani didi boli “ok, maine yahi janne ke liye tumhe call lagaya tha.”
Mai bola “ji didi.”
Vaani didi boli “waha koi nahi baat to nahi huyi hai.”
Mai bola “nahi didi, yaha par to koi aisi nayi baat nahi huyi hai, jise nayi baat kaha ja sake. Fir bhi hum logon ke shadi me jaane ko lekar jarur kuch badlaw aaye hai. Jaise ab mohini aunty, nitika aur shilpa bhi humare sath shadi me ja rahi hai.”
Meri baat sunkar vaani didi ne puchha.
Vaani didi boli “ye to achi baat hai, nitika riya ki chacheri bahan hai aur is samay neha bhi wahi par hai. Aise me nitika ka neha ke sath is shadi me jana banta hi tha. Magar ye shilpa ka shadi me jana kab tay hua aur kyo.?
Mai bola “didi, usme koi khas baat nahi hai. Aapke call aane ke kuch der pahle hi ye baat tay huyi hai. Maine hi shilpa ko humare sath le chalne wali baat mehul logon se kahi thi.”
“Jiske bad keerti ne shilpa ko call karke humare sath shadi me chalne ke liye mana liya. Kuch hi der me shilpa yaha pahuch jayegi. Shilpa ki mummy khud use chhodne yaha aa rahi hai.”
Meri baat sunkar, vaani didi ne kaha.
Vaani didi boli “ye to bahut achi baat hai. Lekin nitika aur shilpa ko tum logon ke sath shadi me jate dekh kar, mujhe yaad aaya ki, in dono ki shopping to maine karwayi hi nahi hai.”
“Isliye tum aisa karo, mausi se kuch rupye le lo. Shilpa ki mummy ke aate hi, tum ami, nimi, keerti, neha aur mehul milkar nitika, mohini aunty, shilpa aur shilpa ki mummy ko shopping karwa dena.”
“Baki tum khud samajhdar ho ki, kya karna hai, kaise karna hai aur kyo karna hai. Kya tum meri baat ko samajh gaye ho.”
Vaani didi ki ye baat sunte hi, maine hadbadate huye kaha.
Mai bola “ji didi, mai sab samajh gaya hu. Aap chinta mat kijiye, jaisa aapne kaha hai, sab kaam waisa hi hoga.”
Meri baat sunkar, vaani didi ne kaha.
Vaani didi boli “good, mujhe yakin hai ki tum apne saare mission badi aasani se pura kar loge.”
Vaani didi ki baat sunkar, maine kaha.
Mai bola “ji didi, aap chinta mat kijiye, mai saare kaam pure kar luga aur aapko koi shikayat ka mauka nahi duga.”
Vaani didi boli “good, ab mai call rakhugi. Priya se tumhari baat ho to, us se bata dena ki mai apna kaam pura hote hi us se milugi.”
Vaani didi ki baat sunkar, maine kaha.
Mai bola “ji didi, maine priya ko bata diya hai ki, aap apne kaam se free hote hi us se jarur milegi.”
Meri baat sunkar vaani didi ne kaha.
Vaani didi boli “good, ab mai call rakhti hu.”
Mai bola “ji didi.”
Meri baat sunkar, vaani didi ne call kaat diya. Vaani didi ka call katte hi maine thandi saans lete huye mehul se kaha.
Mai bola “abe hume shopping ke liye nikalna hoga.”
Ye kahte huye maine mehul ko vaani didi se huyi baat batayi. Tabhi keerti, neha aur nitika bhi mere kamre me wapas aa gayi. Unhe bhi maine shopping wali baat batayi, jise sunkar, wo shopping me jaane ke liye taiyar ho gayi.
Fir keerti ne bataya ki, usne shilpa wali baat mausi ko bata di hai. Mausi ko isme koi bura nahi laga hai. Is baat me mausi ne apni sahmati de di hai. Keerti ki baat sunne ke bad, mai chhoti maa se rupye lene ke liye niche aa gaya.
Niche aakar maine chhoti maa ko vaani didi se huyi baat batayi, jise sunne ke bad, chhoti maa ne mujhe shopping me jaane ke liye rupye diye. Jise lekar mai wapas apne kamre me pas aa gaya.
Fir meri keerti logon se baat chalti rahi. Kuch der bad, shilpa mere kamre me aayi. Use dekhte hi, nitika ne use shopping ki saari baat batayi. Fir iske bad hum sab shopping me jaane ke liye niche aa gaye.
Niche aakar nitika ne mohini aunty ko shopping me jaane ki baat batayi to, un ne is baat me koi aapatti nahi jatayi aur shopping me jaane ke liye taiyar ho gayi. Shilpa ne bhi apni mummy ko shopping me jaane ki baat batayi.
Jise sunkar, shilpa ki mummy ko shilpa ke liye shopping karne ki baat par koi aetraj nahi tha. Lekin wo apne liye shopping kiye jaane ko sahi nahi maan rahi thi aur iske liye hargij taiyar nahi thi.
Magar bad me chhoti maa aur mohini aunty ke samjhane par shilpa ki mummy bhi apne liye shopping karne ko taiyar ho hi gayi. Humne kamal ko bhi shopping par chalne ko kaha.
Lekin usne ye kah kar shopping par jaane se mana kar diya ki, wo pahle hi apni shopping kar chuka hai. Isliye uska humare sath shopping par jaane ka bilkul bhi man nahi hai.
Jiske bad kuch hi der me mai, ami, nimi, keerti, neha, nitika, mohini aunty, shilpa, shilpa ki mummy aur mehul shopping ke liye nikal gaye. Hum nitika, mohini aunty, shilpa aur shilpa ki mummy ke liye shopping karte rahe.
Lekin ami nimi ko jo bhi apne liye acha lag raha tha, wo kharidti ja rahi thi. Unki dekha seekhi, keerti aur neha ne bhi apne liye bahut kuch kharid liya tha. Hume durgapur ke liye nikalna bhi tha.
Isliye hum jaldi hi apni shopping puri karke ghar wapas aa gaye. Ghar aakar nitika, mohini aunty, shilpa apna saman apne apne bag me rakhne lagi. Ami, nimi, keerti aur neha bhi apna kuch saman apne bag me rakhne me lagi huyi thi.
Thodu hi der me sabka apne bag me saman rakhna ho gaya. Uske bad humari yaha se nikalne ki taiyari chalne lagi. Ab 4:45 ka samay ho gaya tha. Isliye ab sabka saman car me rakha jaane laga.
Kuch hi der me hum sab apni apni car me baithne lage. Pahli car me papa, mausa ji aur uncle baithe. Dusri car me dushyant mausa ji, kamal aur mehul baithe. Teesri car me chhoti maa, richa aunty aur mohini aunty baithi.
Chauthi car me mai, ami aur nimi baithi. Panchvi car me nitika, neha aur shilpa baithi. Chhathvi car me bua ji aur keerti baithi. Saatvi car me aniruddha, niranjan aur manik baithe. Jabki bus puri tarah se khaali thi magar humare sath ja rahi thi.
Anu mausi, chanda mausi aur shilpa ki mummy hume car baithte chale ja rahe the aur ache se safar karne ko kah rahe the. Hum sab logon ke car me baith jaane ke 6bad thik sham 5 baje papa ne humse chalne ko kaha.
Jiske bad papa ki car aage bad gayi. Uske aage badte hi sabhi car ek ek karke aage badne lagi. Maine jaate jaate chanda mausi ko apna khayal rakhne ko kaha. Jise sunkar, anu mausi ne kaha.
Anu mausi boli “tujhe chanda ki fikar karne ki jarurat nahi hai. Yaha chanda khayal rakhne ko mai hu. Tu bas apna khayal rakhna aur jaldi se shadi nipta kar wapas aana.”
Anu mausi ki baat sunkar, maine unki baat ki haami bhari aur fir meri car bhi aage bad gayi. Meri car ke aage badte hi, baki ki car bhi aage badne lagi. Kuch hi der me humari car aur bus sadak par daudne lagi.
Hume malum tha ki, hume jyada lamba safar tay nahi karna hai. Isliye durgapur jaane ke liye humne car ko chun kar kuch bhi galat nahi kiya tha. Humara ye safar suru ho chuka tha.
Is safar me ja rahe sab apni apni tarah se khush chal rahe the. Sab inhi khushiyon ke sath juhi didi ki shadi me shamil hone ke liye ja rahe the. Jaha papa ko is baat ki khushi thi ki, unki tay ki gayi is shadi me koi bhi unke khilaf najar nahi aa raha hai.
Wahi dushyant mausa ji ko is baat ki khushi thi ki, wo ab fir pahle jaise humare parivar ke sath chalne lage hai. Uncle ko ye khushi thi ki, wo bimari se uth kar fir se kahi aane jaane layak ho gaye hai.
Wahi mausa ji ko is baat ki khushi thi ki, wo ab apne parivaar ke mukhiya ki tarah chalne lage hai aur unhe apne ghar ke faislon me papa ki barabari ka darja diya jaane laga hai.
Kamal ko khushi thi ki, use is shadi ke bahane do teen din ki chhutti mil gayi hai. Ab wo bhi meri aur keerti ki tarah kahi ghumne ja raha hai. Wahi bua ji ko khushi thi ki, wo fir apne parivaar me shamil hai
Mohini aunty aur nitika ko neha ke sath is shadi me shamil hone ki khushi thi. Wahi neha ko khushi thi ki, wo apni chachi aur chacheri bahan ke sath kahi ghumne ja rahi hai.
Shilpa ko khushi thi ki, wo humare parivaar ka ek hissa banker is shadi me shamil hone ja rahi hai. Wahi mehul ko khushi thi ki, uski pol mere samne nahi khuli hai aur mai bhi sabki tarah is shadi me shamil hone ja raha hu.
Chhoti maa ko khuchashi thi ki, is shadi me maine koi lafda khada nahi kiya hai aur ye shadi khushi khushi puri hone ja rahi hai. Wahi ami nimi ko khushi thi ki, mai is shadi ki band baja kar rakh duga.
Keerti ko khushi thi ki, samay rahte hi sab thik ho gaya hai aur ab wo juhi didi ke sath bura saluk karne walon me shamil nahi hai. Wahi mujhe is baat ki khushi thi ki, mai 2 mahine bad juhi didi se miluga.
Hum sab apni apni inhi khushiyon ke sath, hansi khushi alag alag car me juhi didi ki shadi me shamil hone ke liye chale ja rahe the. Sab alag alag car me the, fir bhi sabhi car ek ke pichhe ek chal rahi thi.
Jis se saare raste me hansi khushi ka mahol bana chal raha tha. Ek thi. Jisme ke pichhe ek car chal rahi thi aur fir sabse aakhiri me ek bus lagi huyi chal rahi thi. Kahne ko to, is bus me driver aur conductor ke alawa koi bhi nahi tha.
Magar ye mere bap ki ek kaali kartoot thi. Jise wo na jaane kya soch kar anjam dena chahta tha aur hum sabko bus me durgapur le jana chahta tha. Lekin bas is baat ki jababdari wo lena nahi chahta tha.
Isliye usne iska faisla bua ji par chhod diya. Lekin iske liye pahle mujhse puchh lene ko kah diya tha. Taki bus ke liye mai mana karu to, apne bap ke faisle ke khilaf jaane ka iljam mere upar aa jaye.
Maine bus me jaane ki baat to, bua ji ki nahi maani thi. Lekin jab papa ka naam isme samne aaya to, maine bua ji ki baat hi unke samne rakh kar, bus apne sath le chalne ki baat kah kar, apne bap ki is kartoot se apna bachav kar liya tha.
Is tarah se ye bus, meri vajah se nahi, bua ji ki vajah se humare sath ja rahi thi. Bua ji ko papa ka dil todna acha nahi laga tha. Isliye hum sab to, car me ja to rahe the. Lekin humare sath bus bhi ja rahi thi.
Is bus ka yaha ya waha kya upyog hona tha, ye to bua ji bhi ache se nahi janti thi. Wo to bas papa ka dil rakhne ke liye ye bus humare sath lekar chal rahi thi. Lekin ye bus ab papa ke liye hi musibat banti ja rahi thi.
Kyoki jaha bhi humari car chay ya nashte ke liye rukti. Bus bhi wahi par ruk jati thi. Fir bua ji papa se kahti ki bus ke driver aur conductor ko bhi chay nashte ke liye bhi kah do.
Jis vajah se papa ko bus ke driver aur conductor ko bulana pad raha tha. Jo baat papa ko jara bhi achi nahi lag rahi thi. Lekin bua ji kisi vajah se papa ko ye sab karna pad raha tha.
Khair is mahol me papa ke siwa sab khush chal rahe the. Isi tarah se chalte huye humara dhai ghante ka safar pura ho gaya aur ek ek karke humari car durgapur me juhi didi ke mama ke ghar ke samne rukne lagi.
Humara abhi apni car se utarna suru bhi nahi hua tha ki, geeta aunty bhagti huyi humare pas aa gayi. Shayad unhe humare waha pahuchne ki khabar papa ya chhoti maa pahle hi de chuke the.
Isliye wo humare waha pahuchte hi, humare pas aa gayi thi. Un ne aate hi, hume apni apni car se utarne se rokte huye kaha.
Geeta aunty boli “abhi tum sab apni apni car me hi baithe rahna. Abhi apni car se koi mat utarana.”
Geeta aunty ki baat sunkar, hum me se koi bhi apni car se niche nahi utra. Humse itni baat kah kar, geeta aunty bhag kar wapas apne ghar ke andar chali gayi. Unke jaane ke bad, mai juhi didi ke mama ke ghar ki taraf dekhne laga.
Juhi didi ke mama ke ghar ki taraf dekhte dekhte achanak hi meri najar, us ghar ki pahli manjil ki balcony par khadi ladki ki taraf chali gayi. Use dekhte hi meri rooh andar tak kaanp kar rah gayi.
_____________________________
Last edited:
