Chapter 3 - udaipur ka safar
Mumbai ki subah hamesha shor aur bhaag-daud se bhari hoti hai, lekin aaj Rathore house me ek ajeeb si khamoshi thi. Samaan raat ko hi pack ho chuka tha, par ghar ke mahaul me ek aisa thahraav tha jo kisi bade toofan ke aane se pehle mehsoos hota hai.
Meera aaine ke saamne khadi thi usne ek behad sundar halke neele rang ki saree pehni thi uske haath halke se kanp rahe the jab woh apne kaan ki baaliyan theek kar rahi thi uski aankhon me 19 saal ka beeta hua waqt tair raha tha.
Peechhe se darwaza khulne ki aahat hui. Vikram andar aaya usne ek dark grey rang ka suit pehna tha aur chehre par hamesha ki tarah wahi shaant aur gambhir bhaav tha lekin Meera use itne saalon se jaanti thi woh samajh sakti thi ki Vikram ke andar bhi ek kashmakash chal rahi hai.
Vikram ne Meera ke kandhe par haath rakha aaine me dono ki nazrein mili.
Papa: "Ghabrahat ho rahi hai?"
Meera ne dheere se sir hilaya.
Maa: "Jis ghar ko maine apni marzi se chhoda tha, aaj wahan kis haq se kadam rakhungi, yehi soch rahi hoon. Papa kya kahenge? Maa ki nazrein kaise saamna karungi?"
Vikram ne use apni taraf ghumaya.
Papa: "Hum wahan maafi maangne ya purani baatein khodne nahi ja rahe hain. Zindagi aage badh chuki hai aur hum wahan ek parivaar ki tarah ja rahe hain, apni izzat ke saath aur yaad rakhna, tum akeli nahi ho."
Darwaze par ek halki si dastak hui. Aarav wahan khada tha usne dark jeans aur ek safed kameez pehni hui thi, sleeves aadhi mudi hui. Dikhne me woh bilkul apne pita jaisa confident lag raha tha lekin uske honton par wahi halki si muskaan thi jo mahaul ko naram kar deti thi.
Aarav: "Maa, agar aap dono ka yeh emotional scene poora ho gaya ho, toh gaadi bahar taiyaar hai airport humara intezaar nahi karega."
Meera halke se muskurayi aur apni baali theek karke aage badhi.
Maa: "Tumhari is zubaan par kisi din taala lagega, Aarav."
Aarav: "Maa, meri zubaan hi toh is ghar ki raunak hai. Chaliye ab."
Mumbai se Udaipur ka safar lagbhag do ghante ka tha. Flight me teeno apni apni sochon me goom the. Aarav khidki ke paas baitha tha aur baadalon ko pichhe chhutte dekh kar woh bas yahi soch raha tha ki uski maa jis jagah badi hui, wahan ke log aur mahaul kaisa hoga. Usne Rajasthan ke baare me kitabon me padha tha, par apno se milne ka anubhav bilkul alag hone wala tha.
Jab flight ne Udaipur ke airport par land kiya toh bahar nikalte hi hawa ka rukh badla hua sa laga. Mumbai ki nami aur shor ki jagah yahan ki hawa me ek shanti aur sookha-pan tha. Aas-paas dikhti Aravalli ki pahaadiyan is shahar ko ek shahi aur thahra hua roop de rahi thi.
Aarav ne gehri saans li.
Aarav: "Mahaul me kuch alag si baat zaroor hai yahan ki."
Vikram ne kala chashma pehnte hue kaha.
Papa: "Mewar ki mitti me itihas aur zidd, dono baste hain."
Bahar aate hi unhe lene ke liye ek vyakti khada tha. Usne saaf-suthre kapde pehne the aur uske haath me ek tablet tha jis par 'Rathore Parivaar' likha tha. Paas aate hi usne aadar ke saath haath jode.
Vyakti: "Khamma Ghani, Hukum. Mera naam Niranjan hai. Arjun banna ne mujhe aap sab ko lene bheja hai."
Papa: "Ghani Khamma, Niranjan ji."
Meera ne us vyakti ko dhyan se dekha.
Maa: "Niranjan? Tum pehle haveli ke bagiche ka kaam dekhte the na?"
Niranjan ke chehre par ek badi si muskaan aa gayi.
Niranjan: "Haan bai-sa. Aapne pehchan liya, yeh mera saubhagya hai. Haveli me sab aapki hi raah dekh rahe hain."
Aarav shanti se yeh sab dekh raha tha. 'Bai-sa', 'Hukum', 'Banna'—yeh shabd uske liye bilkul naye the, lekin uski maa ke chehre par in shabdon ko sunkar jo ek apnapan aaya, woh usne saaf mehsoos kiya.
Bahar ek chamakti hui nayi kaale rang ki luxury SUV khadi thi. Gaadi me baithne ke baad safar shuru hua. Shahar ke chaure raste, naye aadhunik hotels, aur unke beech jhalakti purani shahi imaaraten—Udaipur purane aur naye waqt ka ek behtareen mel lag raha tha.
Jaisa sab ne decide kiya uske mutabik, pehle din unka thikana haveli nahi, balki jheel ke kinare bana ek heritage hotel tha. Arjun ka manna tha ki itne saalon baad sidhe haveli aana sabke liye bohot bhari pad sakta hai, isliye pehle woh hotel me thoda aaram karein aur dopahar ke lunch ke liye Sisodia haveli aayen.
Hotel ke kamre me pahunch kar Aarav bed par baith gaya.
Aarav: "Toh... abhi do ghante hain lunch me. Dimaag me koi plan banaya hai ya sidhe ja kar apno ke beech khade hona hai?"
Vikram ne apna coat utaar kar chair par rakha.
Papa: "Zindagi koi office ki meeting nahi hai jahan har cheez pehle se tai ki jaye. Wahan tumhari maa ke apne log hain. Bas respect ke saath pesh aana, baaki sab apne aap ho jayega."
Aarav ne haan me gardan hilaya usne dekha ki uski maa chupchaap khidki se bahar jheel ko dekh rahi hain toh woh uth kar uske paas gaya aur unke kandhe par apna sir rakh diya.
Aarav: "Aap chahein toh thoda ro sakti hain. Main papa ko bahar bhej dunga."
Meera ne uske gaal ko halke se chuaa aur muskurayi.
Maa: "Aansu itni aasani se nahi nikalte, beta bas thodi si bechaini hai."
Aarav: "Main hoon aapke saath."
Do ghante baad, unki SUV ek posh ilaake ki taraf badhi aur phir unki gaadi ek unche aur chaudae automatic lohe ke gate ke saamne ruki gate par chamakte pital ke aksharon me likha tha— **"Sisodia Niwas"**.
Gate apne aap khula aur gaadi andar daakhil hui. Aarav ne khidki se bahar dekha aur halka sa hairaan hua usne socha tha ki koi purani, pattharon wali khandar jaisi haveli hogi, jahan pigeons ud rahe honge par yeh jagah bilkul alag thi.
Yeh ek behad aadhunik aur aalishan estate tha, jisme Rajputana shahi andaz ko nayi takneek ke saath joda gaya tha. Haveli ki deewaren carved pattharon se zarur bani thin, par unme bade-bade floor-to-ceiling glass lage the, courtyard me perfectly kata hua ghaas ka maidan tha aur ek taraf luxurious gaadiyan khadi thi. Ye ek sachhe business empire chalane wale parivaar ka ghar lag raha tha—purana roab, par naya andaaz.
Gaadi ek bade se porch ke paas ruki.
Jaise hi teeno gaadi se bahar aaye, glass ke alishan main darwaze se ek vyakti bahar aata hua dikha. Umar lagbhag Vikram ke barabar, lamba kad, chehre par sakhti, par aane ki jaldi me kadam tez the. Woh the Arjun Sisodia.
Arjun paas aakar ruk gaya usne pehle Vikram ko dekha, phir uski nazar Meera par gayi.
Saalon ki doori, gussa, aur ahankaar—sab kuch un aankhon me tha, par sabse upar tha ek bhai ka apni bahen ko saalon baad dekhne ka jazba. Meera ke kadam bhi wahi ruk gaye the.
Arjun ki aawaz thodi bhari hui thi.
Mamaji: "Mujhe laga tha tu nahi aayegi."
Meera ke aansu ab nahi ruke woh aage badhi aur apne bhai ke gale lag gayi. Arjun ne bhi apni aankhen band kar li aur usne Meera ko waise hi sambhala jaise woh bachpan me sambhalta tha.
Vikram shanti se ek kadam peechhe khada tha.
Kuch der baad jab Meera thodi shant hui, toh Arjun ne pichhe hat kar Vikram ki taraf haath badhaya.
Mamaji: "Swagat hai, Vikram."
Vikram ne thoda aage badh kar use haath milaya, aur phir use halke se gale lagaya.
Papa: "Kaise ho, Arjun?"
Mamaji: "Zimmedariyan waqt se pehle thaka deti hain par theek hoon."
Phir Arjun ki nazar us naujawan ladke par gayi jo thoda peechhe khada dhyan se yeh sab dekh raha tha.
Aarav ne aage badh kar thoda jhukte hue Arjun ke paanv chhue.
Aarav: "Pranaam, mama ji."
Arjun ne use kandhe se pakad kar seedha kiya aur uske chehre ko dekha.
Aarav ka kad lamba tha, aankhen Meera jaisi aur chehre ki banawat aur aatmavishwas bilkul Vikram jaisa.
Arjun halke se muskuraya.
Mamaji: "Pehli baar kisi ne is ghar me mujhe 'mama' kaha hai. Ajeeb lag raha hai, par achha bhi bada ho gaya hai tu."
Aarav ne halke se has kar jawab diya.
Aarav: "Aashirwaad aap logon ka hi hai, bhale hi door se mila ho."
Us ek line me aadar bhi tha aur ek meethi si shikayat bhi, jo Arjun turant samajh gaya. Usne Aarav ki peeth par pyaar se haath thap-thapaya.
Mamaji: "Andar aao maa subah se baithak me tumhara hi intezaar kar rahi hain."
Teeno Arjun ke saath andar gaye andar ka mahaul kisi 5-star hotel ke lobby jaisa grand tha. Ek bada sa central AC hall, jiske beecho-beech modern indoor water design ke paas ek khoobsurat tulsi ka chaura rakha tha. Ek bade se velvet sofe par ek buzurg mahila baithi thi. Safed baal, sooti saari, aur chehre par bepanah mamta woh Vasundhara Devi thi—Meera ki maa aur Aarav ki nani.
Unke paas hi ek aur mahila khadi thi—woh Padmini thin, Arjun ki patni.
Meera ko dekhte hi Vasundhara Devi sofe se uthne lagi. Unke haath kanp rahe the.
Meera daud kar unke paas gayi aur unke gale lag kar rone lagi.
Meera: "Maa... mai aa gayi maa."
Vasundhara Devi ne rote hue Meera ka maatha chooma.
Nani: "Meri bachchi...tu aa gayi."
Padmini mami bhi aage aayin aur unhone bhi Meera ko gale lagaya.
Mami: "Ghar aakhir poora ho hi gaya."
Tabhi Vasundhara Devi ki nazar Aarav par padi. Unhone apne haath aage badhaya.
Nani: "Ye mera naati hai?"
Aarav aage badha aur usne apni nani ke paanv chhue Nani ne dono haathon se uske chehre ko pakda.
Nani: "Kitna bada ho gaya hai. Meera, iski aankhen bilkul tere jaisi hain."
Aarav ne muskurate hue nani ke haathon ko apne haathon me thaam liya.
Aarav: "Nani, aankhen maa ki hain, par bhookh aapke in rajwado jaisi lag rahi hai. Subah se papa ne kuch dhang ka khaane nahi diya."
Uske is halke-fulke mazaak ne us bhaari aur bhawuk mahaul ko achanak se halka kar diya. Nani hans padi aur apne aansu pochte hue boli.
Nani: "Arre! Mere bachche ko bhookha rakha? Padmini, jaldi khana lagao."
Mahaul thoda shant hone laga tha, par asli pariksha abhi baaki thi. Aarav aur Vikram dono jante the ki is ghar ka sabse bada hissa abhi tak unke saamne nahi aaya tha.
Arjun ne Vikram aur Meera ki taraf dekha aur unki aawaz thodi dheemi ho gayi.
Arjun: "Papa apne study room me hain. Doctor ne unhe zyada chalne-firne se mana kiya hai. Humein wahin chalna hoga."
Meera ki chhati me ek darr sa baith gaya. Mahendra Singh Sisodia. Jinhone apne usoolon ke aage apni hi beti ko ghar se jaane diya tha jab woh unke samne jayegi tab kya hoga.
Vikram aage aaya aur Meera se kaha.
Vikram: "Chalo."
Arjun unhe lekar ghar ke ek alag hisse me gaya. Ek bada sa lakdi aur kaanch ka darwaza khula. Andar ka kamra kisi ameer aur shaktishali insaan ki study room jaisa tha. Ek taraf badi si kitab ki almari, doosri taraf kaam karne ki desk, aur ek kone me resting chair. Kamre me roshni bohot thi, aur ek taraf letest technology ki medical machine bhi rakhi hui thi jo unki beemari ka ishara de rahi thi.
Resting chair par ek buzurg vyakti baithe the. Bimari ne unka sharir kamzor zaroor kar diya tha, par unki aankhon ki chamak aur baithne ka roab abhi bhi kisi raja jaisa tha woh the Mahendra singh Sisodia Aarav ke nanaji.
Mahendra Singh Sisodia ne aahat sunkar samne dekha.
Kamre me ek dam sannata chha gaya. Meera wahin darwaze ke paas ruk gayi.
Vikram aage badha aur thoda jhuk kar bola.
Vikram: "Pranaam."
Mahendra Singh ne pehle Vikram ko dhyan se dekha unki nazron me gussa nahi tha bas ek thahraav tha.
Nanaji: "Baal safed hone lage hain tumhare, Vikram. Zidd shayad waqt se pehle insaan ko thaka deti hai."
Vikram ne poori shanti se jawab diya.
Vikram: "Waqt ne sikhaya hai ki kuch zidd waqt ke saath chhod deni chahiye."
Mahendra Singh ne uske jawab ka koi virodh nahi kiya. Phir unki nazar Meera par aakar ruk gayi. Meera himmat jutakar aage aayi aur unke paanv chhoone ke liye jhuki toh Mahendra Singh ne apne kaanpte hue haath ko aage badha kar uske sir par rakh diya. Unhone koi shabd nahi kaha, par us chhuvan ne sab kuch keh diya gaya.
Kuch der baad, Mahendra Singh ki nazar peechhe khade us lamba-chauda ladke par gayi jo poore aatmavishwas se unhe dekh raha tha.
Nanaji: "Aarav."
Aarav dheere se aage aaya aur poore aadar ke saath jhuk kar usne bhi unke paanv chhue.
Aarav: "Pranaam, nanaji."
Mahendra Singh ne use uthne ka ishara kiya aur use gaur se dekha.
Nanaji: "Nazrein churana nahi aata isko."
Aarav ne bilkul saadharan awaaz me kaha.
Aarav: "Maa ne bataya tha ki humari family ke log nazrein nahi churate, aur papa ne sikhaya hai ki jab tak koi galati na ho, tab tak nazrein jhukani bhi nahi chahiye."
Is napa-tula aur himmat se bhara jawab sunkar poore kamre me thodi der ke liye khamoshi chha gayi. Meera thoda ghabra gayi thi Par agle hi pal, Mahendra Singh Sisodia ke un sakht honton par ek chhoti si muskaan aagayi.
Nanaji: "Rathore ka gurur aur Sisodia ka khoon Dono jhalak rahe hain isme."
Unhone Aarav ke kandhe par haath rakha.
Nanaji: "Tumhara swagat hai apne nanihal me."
Aarav ne ek rahat ki saans li aur halka sa muskuraya.
Sab log ab thoda halka mehsoos kar rahe the. Tabhi kamre ke bahar darwaze par aahat hui.
Ek ladki, jisne bohot hi simple suit pehna tha, wahan aakar ruki. Uske chehre par ek ajeeb si narmi aur masoomiyat thi.
Padmini mami ne mud kar dekha.
Padmini: "Avni, aaja andar."
Woh ladki Avni thi—Arjun ki beti.
Jis bahan ka zikra Aarav ne kuch waqt pehle pehli baar suna tha, woh aaj uske saamne khadi thi.
Aarav ne uski taraf dekha aur halki si muskaan di.
Parivaar ab dheere-dheere jud raha tha, aur Udaipur ka yeh pehla din sirf ek nayi shuruwat bhar tha.
To dosto,
Aaj ke liye itna hi,
Aaram se padhiye aur review dena mat bhuliye ga.
Sahi kaha waqt insan soch badal deta h
Baharhal yaha tow sab sahi raha
Ab dekhte h Rathore pariwar se jab mulaqat hogi tab kaisa rehta h un sabka reaction
Behtareen shaandar update
Award + 10000 Likes + 30 days sticky Thread (Stories)
Award + 7000 Likes + 15 day Sticky thread (Stories)
Award + 3000 Likes