- 16,375
- 110,356
- 259
Romance 𝗧𝗵𝗲 𝗞𝗶𝗻𝗴'𝘀 𝗚𝗮𝗺𝗯𝗶𝘁
- Thread starter Werewolf
- Start date
- 11,819
Gaurav1969
\\\“मनो बुद्ध्यहंकार चित्तानि नाहम्”///
- 1,100
- 2,278
- 143
- 16,375
- 110,356
- 259
Yup. Maybe tonight.
- 16,375
- 110,356
- 259
2nd Update will come tonight guys. 
- 16,375
- 110,356
- 259
Raj_sharma hiya bhi index bana do man 
Awesome updateUpdate - 1 ~ Her
Wo mere saamne thi.
Kuchh qadam aage khadi, street light ki raushni me fasi, uski nazar meri nazar se mili. Aur, jaise kuchh jhalka — Afsos? Glaani? Avagya? — Uski aankhon se guzri aur fir usne aankhein neechi kar li.
Wo meri yaad se vipreet thodi nazuk lag rahi thi. Kamzor. Ek kathputli ki tarah jiski doriyaan kaat di gayi ho.
Mera jabda kass gaya. Gusse me nahi, na hi darr me. Bas ek shaant sweekriti ki mein qamyab tha.
“Arey? Kya hua?”
Ek madhur awaaz mujhe hosh me laayi. Maine palkein jhapkayi, saans chhori aur aage badh gaya. Ek muskaan — iss baar sacchi — mere hontho par bikhar gayi.
“Kuchh nahi.” Maine apna sirr hilaate hue uss awaaz de rahe vyakti se kaha. “Chalo! Chalte hai!”
Aur, jab mein uske paas se guzra, to wo hili nahi. Kuchh boli nahi. Wo wahi akeli khadi ho kar mujhe jaate hue bas bebas dekhti rahi.
***
Ek muhavra hai — behti ganga me haath dhona. Dost ki janmdin party par koi mehngi dish mangaa li, kisi shaadi me bina nimantran ke ghus gaye, aksar aadmi ye sab chaaploosi kar hi liya karta tha. Insaan ki pravatti hi aisi thi ki avsar milne par wo laabh uthaane se hich-kichaata nahi tha.
Mere saath bhi kuchh aisa hi hua tha. Jab avsar saamne aaya to maine bhi haath dubo diye. Bas, ek choonk ho gayi... ki jab maine haath duboye, mein ye sunishchit karna bhool gaya ki veh behti nadi pavitra ganga hi thi ya uska vesh dhaaran kiye koi maili dhaara?
---
Baat kuchh varsh poorv ki hai. Indore sheher, din ka teesra pahar, aur sarkari exam nikaalne ki yuvaon me josh ki leher. Haal kuchh yahi tha. Mein bhi iss bhaag-daud me bhed-bakriyon ki tarah shaamil tha.
Ghar par sabhi shuruvat se hi sarkari naukriyon ki aan baan shaan ki patti padhaate hue aaye the — to maine bhi soch liya tha ki samay hai to ek baar prayaas karne me koi harz to nahi!?
10 May ki uss chil-milaati dhoop me bhi mein aaj library aaya tha. Wo kehte hai na — nirantarta hi safalta ki kunji hai.
Mein apni seat par baitha hua laptop par lecture chala ke padh hi raha tha jab mujhe apni row me, khusur-pusur ki awaazein sunaayi di.
Mein muda, thoda pareshan. Earphones ko kaano se nikaala. Ek ladki librarian se baat kar rahi thi. Usne meri orr ishaara kiya. Librarian ne sirr hilaaya. Usne bhi sirr hilaaya. Aur, fir muskuraate hue wo meri disha me aane lagi.
Mujhe nahi pata tha unke beech kya baatein hui aur na hi maine iss baare me zyada dhyaan diya. Shayad koi naya sadasya? Mein abhi apna earphone lagaane hi waala tha jab-
"Excuse me! Yaha chair nahi hai kya?"
Mein ruk gaya. Uski awaaz... madhur thi.
Iss baat se inkaar nahi kiya jaa sakta tha ki wo khubsurat thi. Ek aisi ladki jo kamre me ghuste hi maatr apni upasthiti se uss par qabza karne ki maang rakhti thi.
"Yaha bahut si chairs hai. Sab ek jaisi hi hai." Maine jawab diya. "Apni pasand ki koi si bhi utha lo."
Usne ek baar palak jhapkayi. Muskaan ab bhi barkaraar thi. Aur, fir bina samay zaaya kiye wo mere bagal se baith gayi.
Maine use andekha kiya aur apni screen par dobaara se lag gaya.
Kintu, aas-paas ke ladke itne saiyammit nahi the. Wo nazrein chura rahe the. Chori-chhipe taad rahe the. Aur, mein?
Mera ek usool tha — kabhi bhi kisi se pehli mulaqat me apne aap ko utaawla mat dikhao.
Par, agar mere andar ek handsome naujavan hone ka thoda bahut guroor tha, to wahi guroor uske andar apne khubsoorat hone par koot-koot kar bhara hua tha.
Jis wajah se, humaare beech aur koi baat nahi hui. Chaar ghante beet gaye. Koi shabd nahi. Koi nain-matakka nahi. Bas, do ajnabee ek dusre ke agal-bagal baithe, apni-apni duniya me vyast.
Jab tapti dhoop kam hui aur ghadi me shaam ke 6 bajne me 10 minute kam the, to ek chai ki talab ne mujhe jakad liya. Iske bina meri shaam adhoori hi rehti thi.
Maine baayi orr dekha. Koi jaana-pehchaana chehra dhoondhne ki koshish karne laga. Koi aisa jise mein chai ke liye ek chhote break par le jaa saku. Lekin, shayad meri nazar bahut derr tak tiki reh gayi.
Aur, usne meri nazro ko pakad liya — mere bagal me baithi wahi nayi ladki.
Usne bina kuchh kahe ek ishaara kiya. Usne apne haath se ek adrishya cup pakda aur fir use uthaate hue apne muh ke paas le gayi. Fir, bauhe chadha ke mujhse ishaaro me hi poochhi.
Chai?
'Huh?'
Yeh pehli baar tha. Kisi bhi ladki ne mere saath aisa pehle kabhi nahi kiya tha. Khud se upat ke kuchh poochhna. Kaha gaya kuchh derr pehle ka iska ghamand?
Magar, maine bhi haami bhar di. Waise bhi mein chai ke liye kisi ko dhoondh hi raha tha.
Wo khadi hui aur aage badhi. Fir, ruki aur palat ke dekhi ki mein aa raha hu ya nahi?
Mujhe aata dekh wo muskurate hue neeche library ke baahar khadi ho gayi. Koi baat-cheet nahi, koi parichay nahi, bas chaar ghante ki khamoshi ke baad achanak se yeh — jaise ki kisi kitaab se nikaala gaya drishya jise maine aaj tak nahi padha tha.
Kya aisa bhi hota tha? Ladkiyaan itni straightforward kab se hone lagi bhala? Mein neeche aaya to hum saath-saath chalne lage.
"Toh?" Usne meri taraf dekhte hue kaha, "Tumhara chehra by default hi aisa hai ya fir mere chai ka poochhne se offend ho gaye?"
"Huh? Kya?"
Wo hasi-mazaak karte hue boli, "Tum aisa look de rahe ho jaise kisi ne bina paise diye tumhe kaam par mazdoori karne ke liye rakh liya ho haha."
Maine apna gala saaf kiya. "Ahem! Mujhe bas... Iski ummeed nahi thi."
"Kiski?" Usne bauhe uthaate hue poochha.
"Tumhari. Mera matlab hai, ye situation. Ek ladki, nahi... Koi bhi ladki bina koi baat kiye kisi ajnabee ladke ko chai ke liye invite nahi karti. That's... Unconventional."
Wo muskurayi. "Ha! Mein aisi hi hu. Unconventional. Lekin, chinta mat karo. Mein sirf weekends ko hi kidnap karti hu. Tum safe ho. Abhi ke liye. Haha."
Mein bhi uske saath hasa. "Jaan kar achha laga ji. Aaiye!"
Hum yuhi tehelte-tehelte chaurahe par ek chai ke stall par pahuche.
"Do cutting, bhaiya!" Mere bolne se pehle hi usne chai-waale ko dekh bola.
Ek pal ke liye mein use dekhta raha. Ye ladki! Isne duniya-daari dekhi hui thi. Isme koi shaq nahi tha.
Chai lete hue wo meri orr mudi. "Toh? Tumhara kya scene hai? Itni lagan se kaun padhta hai? Tum to aise ghuse the jaise maano koi bam diffuse kar rahe ho."
Mein chai ki chuski lete hue muskuraya. "Bilkul. Mein wahi kar raha tha. Aur, use general studies kehte hai madam."
"Ah! The great Indian dream : exam crack karna aur fir apne maa-baap dwara unke emotional blackmail karne par unki pasand ke insaan se shaadi kar lena. Right?"
Mein fir muskuraya. "You are oddly accurate."
Wo thoda meri aur jhuki. "Aisa isliye hai kyunki, mein oddly observant bhi hu, mister. Pichhle chaar ghanto me, tumne ek baar bhi meri taraf nahi dekha."
'Huh?'
Usne dabi hui aur gambheer awaaz me kaha. Ek pal ke liye mere shareer me jhurjhuri daud gayi. Mein hairaan tha.
"Tumne wo bhi notice kiya?"
"Mein har cheez notice karti hu."
Usne fir ek santushti bhari aah lete hue chai ka akhiri ghoonth piya aur cup wahi stall ki mej par rakhte hue wapas aa gayi.
Agar, wo observant thi, to mein bhi observation me koi kam nahi tha.
"Tum yaha se nahi ho. Hai na?" Mere sawal par wo chaunki.
Mera teer seedha nishaane par laga tha.
"Kaafi smart ho. Emotionally poochh rahe ho ya geographically?"
"Geographically."
"Ha!" Usne apne kandhe uchkaaye. "Indore me to nayi hu. Kya pata? Shayad rahu, shayad gaayab ho jau?"
Uske kehne ke tareeke me kuchh aisa tha — jaise wo mujhe chetaavni de rahi ho aur saath hi shayad mere saath flirt bhi kar rahi ho.
"Aur, emotionally?" Pata nahi maine ye kyu poochha. Mein khud bhi hairaan tha apne upar.
Wo muskurayi. "Sapne aur duniya ki haqeeqat ke beech kahi khoyi hui hu. Aur, tum?"
"Mein..." Maine apni chai ke cup ki orr ishaara kiya. "Zyadatar caffeine aur taiyaari ki chinta me kahi dooba rehta hu."
Wo hasi, iss baar sach me. "Nice! You have potential. Mujhe caffeine waale log pasand hai."
"Kyu?"
"Kyunki, wo humesha jaagte rehte hai." Kehte hue usne mujhe ek aankh maari.
'Huh? What the hell?'
Mere gaalo par halki si laali chhaa gayi. Ye mere saath flirt kar rahi thi ya mein hi kuchh zyada soch raha tha?
Kuchh derr hum shaant rahe. Fir, usne mujhe dekha — bareeki se.
"Tum waqai alag ho. Sach me. Calculated. Quiet. Lagbhag... Aisa jaise koi rehearsal kar ke baitha ho."
Aur, aaj ke din me pehli baar, maine use gambheerta se dekha. Thoda tanaav me bhi aa gaya tha. Ek paseene ki boond mere maathe se fisalte hue giri.
'Did she just-!?'
"Toh? Kya ye buri baat hai?"
"Nahi! It's interesting actually."
Fir, ek virhaam aaya. Ek aisa virhaam jo ya to baat-cheet ko khatm kar deta hai ya fir lagi hui chingaari ko aur bhi bhadka deta hai.
"Iske alawa..." Usne shaanti bhang karte hue kaha. "Tumhare nichle honth par chai ki ek boond lagi hai."
Aur, iss case me — virhaam ne chingaari ko bhadka diya.
Iske pehle ki mein samajh paata, agle hi pal uska haath utha, mere hontho ke nazdeek aaya aur usne apne anguthe se mere honth par se chai ki boond ko pochh diya.
'???' Mein avaak tha.
"Ab theek hai." Wo muskurayi.
Kuchh derr ke baad, hum library ki orr wapas jaane lage. Mein abhi bhi uski harqat par dang tha. Ye kaun si durlabh prajaati ki ladkiyaan thi? Mein ab tak inse vanchit kaise tha?
Iske pehle ki mein kuchh aur poochh paata, hum library tak wapas aa chuke the. Maine dekha ki library ke bahut se log hume hi dekh rahe the.
"Uh oh!"
"Kya hua?"
Mein uski orr jhuka. "Log hume hi dekh rahe hai. Gossip engines shuru ho chuke honge ab tak. Kal tak hum kisi ki imagination me shadi-shuda honge aur humaare do bacche bhi ho chuke honge."
"Hahahahaha!" Wo zorr se hasi. "Oh accha? Kya pata wo humara honeymoon bhi plan kar liye ho? Mujhe waise bhi ek vacation ki zaroorat hai."
'Fuck!' Mujhe laga tha wo meri baat ka bura maan jayegi par ye toh-
"Tum... Tum waqai me ekdum befikr ho."
"Oh come on! Meri life me uncle-aunty, chacha-chachi, mama-mami, na jaane kitne log gossip karte aaye hai. Sab dogle hai. Tumhe lagta hai mujhe inn library ke baccho ki gossip se koi farq padega? Chill!"
Iske pehle ki mein jawab de paata, library ke logo me se koi humaari taraf aane laga.
Lambe, confidence se bhare hue qadam. Aankhein aisi jaise maano har waqt aas-paas ka jayza le rahi ho.
Aur, haan — sundar. Behad sundar.
Meri nazrein kuchh derr ke liye uss par tiki rahi. Usne dekha. Humari aankhein ek pal ke liye aapas me mili. Aur, maine jaldi se nazrein dusri orr ghuma li.
Wo ladki mere bagal se khadi iss nayi ladki ki orr mudi.
"Fir? Kya hua? Mil gayi seat?"
"Haan! Wo bhi cooler ke paas. Badhiya jagah hai."
"You are lucky! Chalo, fir baad me milte hai."
Wo jaane ke liye mudi, lekin mudne se pehle uski nazar meri nazar se milna nahi bhooli.
Jab tak wo ladki chali nahi gayi tab tak hum dono shaant rahe.
"Lagta hai kisi ke fan club me badhottri ho gayi hai." Wo achanak boli.
"What? Aisa kuchh bhi nahi hai."
"Tum ghoor rahe the use."
"Mein ghoor nahi raha tha."
"You were literally studying her soul hahaha!"
"Urgh!" Maine karaahte hue kaha. "Yahi kaaran hai ki mere jaise log single kyu rehte hai."
"Hey, chill! Maine ye nahi kaha ki ye bura tha. I like honesty. And, suspense as well. Chalo accha. Ab upar chale?"
Iss se pehle ki hum kitaabon aur uddeshyo ki qabr me wapas chale jaaye — mujhe kuchh ehsaas hua.
Yeh koi sadharan din nahi tha. Aur, ye ladki... Meri kahani me koi sadharan panna nahi thi.
Mein sarr na me hilaate hue uske sang upar chala gaya. Humne kuchh derr aur padhaayi ki aur jab jaane ka samay hua to akhirkar maine poonchh hi liya.
"Hey! Tumne... apna naam nahi bataya!?"
Woh hasi. "Bahut derr intezar nahi kar liya tumne? Zyadatar ladke 5 minute ke andar hi poochh lete hai."
"Mein zyadatar ladko ki tarah nahi."
"Jaanti hu." Woh muskurayi. Thoda rehesyamayi dhang se. "Kya pata? Shayad kal mein tumhe bata du?"
Aur, aise hi woh mudi aur waha se chali gayi. Mein kisi patange ki tarah latak ke reh gaya jo garmi ke peechhe bhaagte hai.
'Fuck!'
***
Ghar par mera dhyaan uss ladki ki orr hi baar-baar jaa raha tha. Library ke WhatsApp group par bhi maine use dhoondhne ki koshish ki, magar uski tasveer mujhe kisi bhi profile me nazar nahi aayi.
Na hi number tha. Na hi uska naam mujhe pata tha.
*sigh*
Kya hoga kal? Kya wo aayegi? Mere mann me pehli baar ye anubhutiyaan aa rahi thi. Mein itna utaawla kab se hone laga? Mein utaawla nahi tha shayad isliye usne mujhme interest dikhaaya tha. Warna, library me aur bhi to ladke the. Usne kisi aur se kyu nahi poochha?
Samay par sab kuchh chhor dena hi sahi hoga. Yahi soch mein so gaya.
***
Agle din aaj library me humesha ki tulna me thodi shaanti thi. Shayad kitaabein bhi dhyaan lagaane me vyast thi.
Mein apni seat par pehle se hi chipka hua tha, ek case study padh raha tha jisne mujhe insaano par sawaal uthaane ke liye majboor kar diya. Mujhe unki gandi harqato se ghin aa rahi thi. Aur, tabhi-
Maine use dekha. Wo aa chuki thi.
Aaj koi kurta nahi, aaj usne ek fashionable top pehna hua tha. Ek second ke liye mein bhool gaya ki kuchh derr pehle mein insaano se nafrat kar raha tha.
Woh aise aayi jaise maano hawa uske hi niyantran me thi, halki si muskurayi aur mere bagal me baith gayi. Bas itna hi. Koi 'hi' nahi, koi haami nahi, koi vyangya nahi ki — "Tum ek aur din zinda reh liye?"
Bas khamoshi. Jaise hum do ajnabee the jo bas majbooran ek hi oxygen ko saath le rahe the.
Badhiya.
Maine bhi kuchh na kaha. Ghanto beet gaye. Humare beech ek bhi shabd ka aadan-pradaan nahi hua. Wo apni kitaabon me doobi hui thi aur mein ye sochne me ki usne mujhse kuchh bola kyu nahi?
Aur, jab ghadi shaam ke 6 bajne ke qareeb pahuchi, to veh achanak khadi ho gayi — firse bina kuchh bole — aur meri taraf dekhi.
"Chai?"
Bas itna hi. Do shabd. Koi sandarbh nahi.
Ye ladki kya thi? Na jaane kaisi gutthi thi ye.
Maine sirr hilaaya, aanshik roop se isliye kyunki mujhe chai toh peeni hi thi, aur thoda aanshik roop se isliye kyunki... mein utsuk tha. Woh aage badhi.
Jaise hi mein seedhiyon se neeche utra, maine use dekha — ek aur ladki.
Ye wahi thi. Kal waali. Jis se meri nazrein ek pal ke liye bhidi thi. Wo dono saath khadi thi. Baatein kar rahi thi. Hass rahi thi.
Aur, ab dono meri taraf dekh rahi thi. Badhiya. Meri anxiety ne andar hi andar meri overthinking ko high-five diya. Iss se behatreen aur kya hi ho sakta tha?
Fir, hum sab saath chalne lage — tea stall ki orr. Aur, maine himmat kar firse poochh hi liya.
"So? Kya aaj naam jaanane ko milega?"
Wo muskurayi aur seedhe-seedhe hi boli. "Prerna."
Naam jaante hi mujhe ek ajeeb tarah ki santushti praapt hui.
"Prerna." Maine sirr hilaate hue dohraaya. "Nice name. Naam khubsoorat to hai hi, par saath me ek wazan bhi hai."
Wo fir muskurayi. "Yakeen nahi hota ki tumne aisa kaha. Kyunki, mein ek lawyer hu by the way."
"Wait! Seriously?"
"Haan! Aur, ab mein judiciary ki taiyaari kar rahi hu."
"Judge?"
"Yes!"
"Wow! Aur, ab mein officially unemployed mehsoos kar raha hu."
Veh hasi. "Good haha. Humility attractive hoti hai tumhe pata hai na? Aur, ab apna naam bhi bata do maharaj."
"Rachit!" Maine jawab diya.
Fir, usne humaare bagal se chal rahi uss ladki ki orr ishaara kiya. "Aur, Rachit ye meri dost hai — Khushi. Pehle din library me meri iss se hi mulaqat hui thi."
Khushi ne aadhi muskaan di.
"Aur, khushi, ye wahi ladka hai, jiske baare me maine tumhe bataya tha kal. Kal mein isi ke saath chai peene gayi thi."
"Nice to meet you." Maine kaha. Abhi tak tay nahi kar paaya tha mein ki uske saamne kis roop se pesh aau. Woh bas badle me muskura di.
Aur, aise hi hum stall ki orr badhne lage. Kisi tarah baat-cheet chalti gayi. Khushi ne tabhi ek aur chai waale ka zikr kiya.
"Maine ek baar waha chai pee li thi. Aur, fir dobara uske paas nahi gayi. Fir, kuchh dino baad jab mein waha se guzri to usne mujhe saamne se rok kar poochha — arey madam aap uss din ke baad se aayi hi nahi?"
Prerna hasi. "Kya? Hahaha! Rok kar poochh liya?"
"Wahi na!" Khushi boli. "Mein hi jaanti hu kitna ajeeb laga tha mujhe uss din."
Mein bhi unki baat-cheet me shaamil ho gaya. "Kya pata woh kaho ab bhi intezar kar raha ho? Abhi bhi usi chai ke saath khada ho? Madam ji! Maine ye aapke liye pichhle somvar ko banayi thi. Ye abhi bhi garm hai... Mere dil me."
"Hahahahaha!" Wo dono hi hass padi.
Humari baatein library me bann rahe kuchh naye couples ki orr bhi rukh kari.
"Ek hafta aur do, aur dekhna jald hi library ek dating startup me badal jayegi." Mere kehte hi dono fir se hassne lagi.
Par, maine dhyaan diya ki Prerna ki hasi kuchh feeki thi.
Jab hum khade ho kar chai peene lage, to achanak hi Prerna meri orr mudi.
"Tum Instagram par ho?"
Maine palak jhapkayi. "Haan!"
Aur, usne turant hi fir apna phone mujhe thama diya. Bina kisi hich-kichahat ke. Instagram khula hua tha. Maine apni ID type ki aur use phone wapas de diya. Aur, hum dono ne hi ek dusre ko follow kar liya.
Khushi ne kuchh nahi kaha. Bas, dekhti rahi, shaant aur chaukas.
Fir, ek ajeeb si ghatna hui.
Jaise hi hum wapas jaane lage, Prerna ka mood kuchh badla hua sa prateet hua. Wo kuchh playful nazar aa rahi thi. Kuchh zyada hi playful.
Sadak paar karte samay uska meri kalaayi pakadna, mazaak me kohni maarna, meri baaton par kabhi-kabhi peeth thap-thapaana.
Kuchh bhi anuchit nahi, bas... Ajeeb tarah se. Baar-baar.
Aisa lag raha tha jaise maano wo kehna chaah rahi ho ki — ye ladka mere saath hai.
Maine koi pratikriya nahi ki. Bas confused sherlock holmes ki tarah mental notes leta gaya.
Kintu, mein bewakoof nahi tha. Something was wrong. Jaisa ki maine batlaaya tha. Agar, wo observant thi. To mein iss game me uss se bhi aage tha.
Jaise hi hum library par wapas pahuche to public aaj fir hume ghoor rahi thi. Maine muskuraate hue kaha, "Ye lo. Kal ek ladki thi. Aaj do. Meri reputation viral hone waali hai."
Prerna khil-khilaayi. "Do-do khubsoorat ladkiyon se tumhe khaas tavajjo mil rahi hai. Wo ladke tumhari jagah par hone ke liye mar rahe honge. Aur, tum complaint kar rahe ho?"
"Haan haan! Thank you for blessing me with your presence my ladies."
Ve dono hasi. Aur, aaj ka din yuhi samapt ho gaya. Par, mera dimaag manthan karne me laga hua tha.
Prerna. Khushi. Chai. Ghoorna. Sparsh. Instagram. Weird energy.
Kuchh pak raha tha. Aur, ye roz ki chai nahi thi. Kuchh bada. Kuchh peeth peechhe.
***
Ghar par aate hi mujhe ek cheez pareshan kar rahi thi. Nahi, mere maile kapde nahi.
Instagram.
Maine app khola jaise mein koi khazaane ki tizori khol raha tha. Prerna ki ID.
'Huh?'
Keval 3-4 tasveerein. Followers? 61. Following? 27. Account... sandigdh roop se kaafi naya lag raha tha.
Lekin, ye wahi thi. Isme koi shaq nahi. Wahi muskaan. Iske pehle ki mein aur kuchh chhaan-been kar paata, ek message aaya. Message usi ka tha.
"Toh tum bhi stalk karte ho?"
"Stalk to nahi. Mein ise observational research kahunga."
"Ah! Sabhi stalkers yahi kehte hai jab tak ki netflix par unki documentary nahi aa jaati haha."
"Jaan ke khushi hui ki mein documentary banaane laayak koi material bhi hu."
Usne ek laughing emoji bheja. Aur, hum yu hi baatein karte rahe. Lehza flirt karne waala tha, lekin ati-utsaahi nahi. Smart, aur thoda cheeky.
Aur, fir aayi uski googly.
"Mujhe apna WhatsApp number do. Insta bahut public hai."
Uska paitra saamne tha. Maine bhi zyada sankoch nahi kiya. Use number diya aur humne WhatsApp par switch kar liya.
Aur, uske baad cheezein vastav me vaastavik lagne lagi.
---
Din beetate gaye.
Humari dincharya ab patthar ki lakeer banti jaa rahi thi. Shaam ki serr. Chai ki dukaan. Hum teeno — Prerna, Khushi aur mein — aise saath chalte jaise Yash Raj ke kisi promo me ho.
Library ke ladke bhi dekhte the. Kuchh jalan se, kuchh izzat se, kuchh apna chashma theek karte hue ki - "Asli zindagi to bhai hi jee raha hai."
Aur, mein inn do sundariyo ke beech hota— apni khushi ko chhipaate hue.
Khushi bhi bahut garmjoshi waali thi. Shaant, dayaalu aur hasmukh. Par, uski ye chhavi sirf mere aur Prerna ke saamne hi jhalakti thi. Baakiyo ke saamne wo apne aap ko ek stone cold lady ke roop me hi dikhaati thi.
Usne mujhse khud kaha hua tha-
"Kasam se, Rachit. Mein aaj tak itna apni life me kabhi nahi hasi jitna tum dono ke saath reh ke inn kuchh dino me hasi hu. You guys are just amazing. Khaas kar, tum Rachit... I... I'm glad mujhe tumhari company mili."
Hum teeno ek ho gaye the, jinhe jaanta to har koi tha — lekin, samajhta koi nahi tha.
Raat hui. Mein aaj bhi insta par feed dekh raha tha, jab uska message aaya-
"Suno... Mujhe tumse kuchh kehna tha."
Oh boy. Mera sarcasm generator ruk gaya. Ye kuchh alag tha.
"Tum serious lag rahi ho. Kya hua?"
"Bas suno."
Usne itna hi likha. Theek hai. Mein theher gaya. Wo kuchh type karne lagi. Fir, ruk gayi. Firse type ki aur fir ruk gayi.
Akhirkar, uska message aaya.
"Dekho, Rachit. Mujhe nahi pata ye kaise hua, shayad ye tumhare bolne ke tareeke ki wajah se hua. Ya shayad tumhari aankhon ki wajah se jab tum kuchh sochte rehte ho. But... I've fallen for you, Rachit. I love you."
Excuse me?
Mein wahi baitha raha. Screen ko ghoorta raha. Mujhe laga shayad maine kuchh galat padh liya, lekin nahi. Usne "love" hi likha tha. "Like" nahi "Love."
Ab mein bhavnao me beh jaane waala vyakti nahi tha. Mein uss se adhik observant tha.
But damn.
Prerna jaisi ladki — tez, sundar, aur ek vakeel — iss tarah se qubool kar rahi thi? Wo bhi mere liye?
Agar, mein ye kahu ki mujhe garv nahi ho raha tha to ye jhooth hota. Lekin, mujhe yaha hoshiyar hona pada.
"Prerna... That's a lot. Mera matlab bad way me nahi. Bas unexpected. Ye sab itni jaldi kaise?"
"Ye mere liye jaldi nahi tha."
Aur, fir kahani me naya mod aaya jisne mujhe thoda hila ke rakh diya.
"Tumhe wo pehla din yaad hai jab mein library me tumhare bagal me baithne aayi thi?"
"Ha! Toh?"
"Wo pehli baar nahi tha jab maine tumhe dekha tha."
Rachit.exe has stopped working. Kya matlab? Kya kehna kya chaah rahi thi ye?
"What do you mean?"
"Maine tumhe pehle hi dekh liya tha. Ek din jab tum washroom jaa rahe the tab. Meri seat dusri thi. Lekin, uss din tumne mera attention bhang kar diya tha. You just... looked interesting."
"To jab mein susu karne jaa raha tha tab tum mujhpe fida ho gayi?"
Usne aankh ghumaane waala ek emoji bheja.
"Mein tumhare baare me aur jaanana chaahti thi pagal. Isliye, maine librarian se baat ki thi seats change karwaane ki. Bhaiya ne haan bol diya tha aur iss tarah mein tumhare bagal me aa paayi."
Holy chai. I mean holy shit.
Mein maun reh gaya. Wait-
Tabhi, mere dimaag me uss pehle din ki baat yaad aayi. Wo drishya jab Prerna librarian se baat kar rahi thi. Iska matlab wo wahi seats ki baat kar rahi thi? Shit!
Yaani ye pehle se tay tha? Wo rann-neetik roop se mere qareeb aa rahi thi?
Ye ladki. Jab mein sudoku hal karne me laga hua tha tab ye shatranj khel rahi thi!?
Mein kuchh derr ke liye chupchaap baitha raha.
"Toh tumne shuru se hi sab plan banaya hua tha? You are no joke."
"Keh sakte ho. Par... Tumhare pyaar me padne ka plan kaise bana sakti hu? Iss baat ne mujhe bhi chaunka diya."
Maine ek aah bhari. Isliye, nahi ki mein naraaz tha. Balki, isliye ki... ye sach tha. Messy. Emotional. Aur, intense.
Aur, Prerna imaandaari ki haqdaar thi. Isliye-
"Mein jhooth nahi bolunga. Dekho! Tum sundar ho. Aur, bold bhi. Tumne jo kaha aur kiya, ye sab ek ladki ke liye asaan nahi. Lekin... Mujhe time chahiye, Prerna. You know... It's a lot."
Usne ek pal me jawaab diya.
"Jitna time chaahiye lelo, Rachit. Mein wait karungi. Lekin, zyada time bhi mat le lena mujhe bataane me."
Aur, bas itna hi. Koi dabaav nahi. Koi drama nahi.
Isi wajah se, wo aur bhi khatarnak bann chuki thi. Mein uss poori raat nahi soya.
'Fuck...!!!!'
Na jaane kya hone waala tha.
.
.
.
.
.
.
.
.
.
Jaari rahegi agle bhaag me.
Jaisa ki maine bataaya, ye kahani ek chhoti kahani hogi. Pehla update around 4.3k words ka hai. Isi length ke around baaki updates bhi rahenge. Updates kab aayenge uska mein kuchh nahi keh sakta. Jaise jaise time milta jaayega iss par mein likhta jaunga. Ye ek aisi romance kahani hai jo nazariya badal degi aap sab ka. Aap logo ke relationship ko dekhne ka POV change kar degi. Response hi tay karega ki ise aage badhaana hai ya nahi? Abhi likes ka target set nahi kar raha hu. Bas jitne likes de sakte ho dete jao. Ju log to mujhe achhe se jaante ho. Anyways, keep supporting.
Dhanyavad.
- 16,375
- 110,356
- 259
- 16,375
- 110,356
- 259
Update - 2 ~ Test
Ab tak...
"Mein jhooth nahi bolunga. Dekho! Tum sundar ho. Aur, bold bhi. Tumne jo kaha aur kiya, ye sab ek ladki ke liye asaan nahi. Lekin... Mujhe time chahiye, Prerna. You know... It's a lot."
Usne ek pal me jawaab diya.
"Jitna time chaahiye lelo, Rachit. Mein wait karungi. Lekin, zyada time bhi mat le lena mujhe bataane me."
Aur, bas itna hi. Koi dabaav nahi. Koi drama nahi.
Isi wajah se, wo aur bhi khatarnak bann chuki thi. Mein uss poori raat nahi soya.
'Fuck...!!!!'
Na jaane kya hone waala tha.
Ab aage...
Mujhe nahi pata ki akhir kya ho raha tha.
Nahi. Ise firse dohrana chahunga — mujhe pata tha ki akhir kya ho raha tha.
Ek khubsoorat, hoshiyar, vakeel ladki ne kal raat mujhse apne pyaar ka izhaar kiya tha. Confession. Ek direct, to-the-point confession ~ "I love you."
Mere jaise logo ke saath aisa aam taur par nahi hota tha. Asal zindagi me to bilkul bhi nahi. Aur, khaaskar Indore ki iss library me to bilkul hi nahi.
Mein koi filmy hero nahi tha jo slow-motion me chalta hai aur uske peechhe background music bajta rehta hai. Mein to bas aam, semi-handsome, berozgar, aur caffeine-paglu, ek UPSC ka aspirant tha, jo polity aur international relations ko yaad rakhne me apna dimaag khapa raha tha.
Par, fir bhi... Mein yaha tha. Ek ladki jo mujhpar crush kar rahi thi... Nahi. Ek ladki jo mujhse pyaar kar rahi thi. Jo dekhne me aisi thi maano jisey aap train ke safar me sirf ek baar dekhte ho, aur aapka uss par dil aa jaata hai, aur wo fir aapki bas yaadon me bas ke reh jaati hai. Dobara kabhi nahi dikhti.
Too good to be true. Waqai. Meri bhi yahi soch thi.
Jab mein bathroom me khada, apne nakhoono ko kaat raha tha, aur iss baare me soch hi raha tha, theek usi samay-
'Oops!'
Nail cutter fisal gaya. Maine na aav dekha na taav, drawer khola, ek bandage nikaali aur ungli par baandh li.
Subah ke 9:15 ho rahe the aur mein library ki orr nikal pada. Mein library me daakhil hua aur turant hi meri nazar uss par padi-
Prerna.
Pehle se hi baithi hui thi. Kaano me earphones lagaaye. Apple ka ipad khula hua, aankhein uski screen par video lecture par tiki hui thi.
'Ipad huh!?'
Maine ek mental note kiya ki Prerna ka parivar raees toh tha. Maine kuchh na kaha. Bas, uske bagal se apni seat par gaya aur shuru ho gaya — bag side me, water bottle desk par, notebooks ko arrange karna, aur fir baithna.
Lekin, jab mein apni notebooks arrange kar raha tha, toh usne bagal se dekha. Uski nazar kisi cheez par tiki.
Bandage.
Usne apna video lecture roka aur bas chup-chaap ishaaro me hi poochhi ki : kya hua?
Mein jhuka aur fusfusaaya, "Subah nail cutter se war chal raha tha. Sadly, ek sipaahi shaheed ho gaya."
Usne apni aankhein ghumaayi, lekin mere humour par muskurayi. Aur, firse poochhi, "Zyada lag gayi kya?"
"Nah!" Maine naa me sarr hilaaya. "Ye sab kuchh bhi nahi. Chhote mote ghaav hai."
Usne hasste hue sarr hilaaya aur fir wapas se apne lecture me lag gayi.
Kal raat ka koi zikr nahi. Koi drama nahi. Bas... Khamoshi.
Mujhe uske saiyyam par garv tha, magar thoda darr bhi.
---
Aur, fir aaya tea time. Humara pasandeeda samay.
Khushi humesha ki tarah samay par humaare saath aa gayi aur hum teeno chauraahe ke paas chai ke stall ke liye chal diye.
Maine chai ka disposal cup liya aur foonk maari. Mausam garm tha. Chai bhi garm, fir bhi... Humare beech ho rahi ye baatein humein kaafi raahat pahucha rahi thi jab achanak-
"Arey?" Khushi ne mujhe dekha, "Tumhari ungli ko kya ho gaya ye-!?"
Iss se pehle ki mein jawab de paata, Prerna meri vakeel ki tarah apne client ka bachaav karne ke liye bol padi, "Subah nail cutter se use chot lag gayi. Nothing serious re...!"
Khushi ne halki chinta ke saath meri orr rukh kiya, "Be careful, okay?"
Iss se pehle ki mein haami bhar paata, Prerna fir beech me bol padi, "Wahi na! Mein bhi yahi kehti hu. Par, maharaj ji kabhi sunte hi nahi. Humesha laparvahi."
'Huh!?'
Maine bauhe chadhayi. Mein kabhi sunta nahi??? Mein kab se uski zimmedari bann gaya bhala? Aur, upar se humein mile to bas chand din hi hue the.
Khushi halke se muskurayi, lekin maine uski aankhon me kuchh dekha. Jaise woh kuchh poochhna chaah rahi thi. Kuchh kehna chaah rahi thi.
Prerna ki baatein chaalu thi, "I told him to be careful. Ab chot bhale hi chhoti ho, lekin iss se ab likhte time kitni dikkat hogi. Notes bhi banaane hote hai. Isliye..."
Mein bas apni chai peeta raha, aur dekhta raha.
Prerna mujhse poochhe gaye har sawaal ka jawab aise de rahi thi jaise naye-naye rapper ko kisi ne mic pakda diya ho. Aur, usne bechaari Khushi ko mic pakadne ka mauka tak nahi diya.
Hmm! Interesting!
Chai jab lagbhag khatam hone lagi, tabhi Prerna ne mujhse ek aisa sawaal kiya jaise woh isi lamhe ka intezar kar rahi thi.
"Toh, Rachit... Tumhari koi girlfriend hai?"
Meri chai ne mere galey me U-turn liya aur lagbhag wo muh ke baahar girte-girte bach gayi.
"Excuse me!??" Mein aise pesh aaya jaise maine uska sawaal theek se suna nahi. Kya usne waqai me mujhse ye poochha tha?
"Maine poochha ki tumhari koi girlfriend hai? Sach sach bataana!" Usne dobaara poochha.
Maine Khushi ki orr dekha. Woh na sunane ka naatak kar rahi thi, lekin uske kaan nishchit roop se mera jawaab sunane ke liye ekdum chaukanne khade hue the.
"Nahi!" Maine shaant swar me uttar diya.
Khushi hairaan thi. "Sach me??? Koi crush bhi nahi??"
"Crush??" Maine bauhe chadhayi. "Crush hai na!!!"
Mere jawaab se dono ki aankhein chaudi ho gayi. Aur, dono lagbhag saath me hi poochhi-
"KAUN???"
Aur, maine bas muskuraate hue apne chai ke cup ki orr ishaara kar diya.
"Ye hai meri crush."
Khushi hasi. Par, Prerna mere jawaab se sehmat nahi thi.
"Chal jhoothe! Mein maan hi nahi sakti ki tumhari gf nahi hai."
Dekho toh! Kal khud isne hi mujhe propose kiya tha aur aaj ye mere se meri hi gf ke baare me poochh rahi thi. Jaise ise pata hi nahi tha pehle kuchh...!
The audacity!
"Agar, meri koi gf hoti..." Maine chai khatm karte hue kaha, "toh kya tumhe lagta hai mein yaha padhayi kar raha hota? 10 rupaye ki chai pee raha hota? Aur, iss tapti garmi me zinda rehne ke liye cooler ke bagal se seat ka jugaad karwaya hota?"
Khushi hasi. Par, Prerna aascharya me mujhe dekh rahi thi.
"Oh hooo! Waah mahashay! Tabhi mein sochu ki tumhe itni achhi seat kaise mil gayi?" Prerna mujhse shikayat karte hue boli.
Khushi ko mera mazaak samajh aa chuka tha. Baat sahi thi. Agar meri gf hoti, toh woh tabhi hoti na jab mein use kuchh provide kar raha hota?
Par, asal baat toh ye thi ki-
Haan! Meri ek gf thi. Abhi nahi. Pehle. College ke dinon me. Teen mahino ke liye. Shayad hi use ek asli relationship ka darja diya jaa sake. Lekin, jitna bhi tha... astitva me tha.
Aur, iss sach ko... maine apne tak hi seemit rakha.
Kyunki, bharose ko chai ke break me yuhi nahi baata jaata. Use kamaya jaata hai.
Aur, mein... abhi bhi dekh raha tha. Dekh raha tha ki zindagi kis nayi kahani ko mere saamne chala rahi thi.
---
Jab hum waapas pahuche, wapas se apni seats par virajman hue, tabhi mein apni water bottle uthaate hue water cooler ke liye neeche jaane laga aur Prerna ne mujhe tabhi toka-
"Umm! Rachit!"
"Huh?" Maine palatate hue uski orr dekha.
"Meri bhi bhar laoge, please???" Woh request karte hue poochhi.
Aur, mujhe bhi isme koi taqleef nahi thi. Water cooler neeche laga hua tha. Toh, har baar paani bharne neeche hi jaana padta tha. Jab ek jann jaa hi raha tha, toh logically yahi better tha ki wahi dusre ki bottle bhi bhar laaye.
Magar, haan ye sirf tabhi agar bottle bharwaane waala aapka parichit hai toh... Warna Prerna ki jagah agar koi aur anjaan hota, toh mein use mana kar chuka hota.
Mein neeche aaya, water cooler ke paas bottle bharne laga ki tabhi, library ke theek baahar, parking side se mujhe kuchh awaazein sunayi di-
Library ke hi koi do ladke aapas me kuchh baatein kar rahe the.
"Woh ladki hai na? Patakha waali!?" Ek ne kaha.
"Haan! Nayi waali na? Apple ka tablet rakhi hai behanchod. Kaisi chipki rehti hai bagal waale ladke se."
"Haan! Lagta hai bhai apna UPSC se zyada baterr-baazi me focus kar raha haha."
"Dusri waali bhi aur kamaal ki hai yaar."
"Behanchod sahi kismat hai launde ki. Do do samaan ek saath."
"Lauda kismat behanchod! Bhai friendzoned hoyega abhi wo tu dekhna. Wo ladkiyaan abhi uss se isliye chipki hai kyunki dono hi nayi-nayi aayi hai. Dono abhi zyada kisi ko jaanti nahi hai. Thode din baad dekhna tu-"
"Hmm! Ye baat bhi hai. Tu baat kar le phir haha. Pata le ek do tu bhi."
"Arey apne ko ye sab nahi jamta. Padhayi bhai. Full focus on padhayi."
"Gaandu seedhe-seedhe bol na nahi pategi tere se. Teri shaqal gandi hai hahaha"
"Madarchod! Beta mein chaahu toh abhi pata lu bhai! Par, study bhai! Study!"
"Haan haan!"
Mein jo unki baatein sunn raha tha, achanak hi ruk gaya.
'Huh!'
Mein? Baterr-baazi?? Mein? Aur, friendzoned??
Unki baatein sahi ho ya na ho, lekin maine apne andar ek badlaav mehsoos kiya. Mujhe aabhaas hua ki-
Log dekh rahe the. Sunn rahe the. Notice kar rahe the.
Yeh... Mere aur Prerna ke beech jo kuchh bhi chal raha tha... Woh ab adrishya nahi tha.
Aur, pehli baar, ek sawaal mere dimaag me utpann hua-
Kya mein apne hi jeevan ko lekar... Niyantran me tha? Ya nahi?
Kyunki, jab ek ladki jise aap mushqil se jaante ho, aapko aise ghoore jaise woh aapke aar-paar dekhne ki koshish kar rahi ho, aapko aise chhiye jaise ki ye samaanya si baat ho, aapse aise bole jaise bachpan se aap uske apne ho...
Toh, kuchh toh ajeeb lagta hi tha. Kuchh toh ho raha tha. Par, kya??? Yahi mein samajh nahi paa raha tha.
---
Mein jab upar aaya aur wapas se apni seat par baitha, tabhi wo shuru hua-
Maine mehsoos kiya.
Uski aankhein.
Mujh par.
Pehle to laga ki mein shayad kalpana kar raha hu. Aisa hota hai na ki kabhi-kabhi aapko lagta hai ki aapke sarr ke aas paas machhar bhin-bhinaata hua mehsoos hota hai, lekin asliyat me wo hota hi nahi. Theek waisa hi kuchh yaha bhi tha.
Maine bahut hi dheere se upar dekha. Aur, paaya ki-
Woh ghoor rahi thi. Mujhe.
'Damn!'
Mein jo highlighter se keywords ko highlight kar raha tha, achanak hi stabdh hue ruk gaya.
Humaari nazrein mili.
Khamoshi.
Ek nazar jo bas thodi derr tak tiki rahi. Koi romance nahi, koi gussa nahi, bas... utsukta. Jaise wo mere dimaag ki ek-ek parat ko cheer ke usme jhaakna chaah rahi ho.
Mein hila nahi.
Aur, na hi woh.
Ye ek chhota dwand bann gaya. Humari nazron ke beech ho raha yuddh. Sirf do log, do kursiyo par, agal-bagal, ek dusre ko pehle nazrein hataane ki chunauti dete hue.
Aur, jab mujhe laga ki shayad mein jeet jaunga, tabhi usne apna ek paitra chala, uske honth halke se bikhre, aur ek chhoti si muskaan uske chehre par saj gayi.
'Huh!?'
Aur, bas tabhi-
'Fuck!'
Mein haar gaya.
Meri palkein jhapak gayi. Aur, maine apni nazrein ferr li. Mujhe uske chehekne ki awaaz apne kaanon me sunayi padi. Maine turant hi book par nazar daal 'defeat' shabd ko highlight kiya. Shayad, kuchh zyada hi zorr se...!
Bhale hi mein haar gaya tha par mera dil...
*Badump* *Badump*
Zoro se dhadak raha tha.
'Kya ho raha hai ye!?'
Nahi! Nahi! Nahi! Ye sab theek nahi. Mujhe neeche unn ladko ki baatein yaad aa gayi. Mein yaha padhayi karne aata tha. Na ki ladkiyaan pataane! Mujhe apni padhayi par hi dhyaan dena chahiye. Kahi aur nahi-
Aur, lagbhag 10 minute hi hue the abhi ye sochte ki mera ek pen neeche gir gaya. Jaise hi mein use uthaane ke liye neeche jhuka, theek usi samay woh bhi jhuk gayi. Aur, usi pal-
Humaare haath aapas me sparsh ho gaye.
'Shit!'
Ye pehli baar nahi tha. Usne mujhe kayi baar sparsh kiya hua tha par iss baar-
Kuchh alag tha. Ise mein mehsoos kar paa raha tha. Iski anubhooti... alag thi.
*Badump*
Uski garm twacha, komal ungliyaan, table ke neeche ek pal ke liye humaari aankhon ka milna.
Kismat humesha aise hi pal tabhi kyu laati hai jab aap inn sab ke liye ekdum kam se kam taiyaar hote ho? Maine khud se sawaal kiya.
'Damn it!'
Uska haath turant peechhe nahi hata. Aur, na hi mera. Mein jaanta tha ye ajeeb tha. Mere haatho par mera hi niyantran tha fir bhi maine use peechhe nahi kiya. Pata nahi kyu...
Fir, jaise woh achanak upar uthi aur wapas se apni padhayi me lag gayi, jaise kuchh hua hi na ho.
Lekin, mein- uski iss harqat ke baad mein-
Theek nahi tha.
---
Jaise hi raat ke 8 bajne lage, hum sab apne-apne ghar ki orr gaye.
Mera ghar nazdeek hi tha. Lagbhag 1.5-2 km ki doori par. Mein apne kamre me pahucha, bag patka, darwaza band kiya, aur bistar par lait gaya.
Fir, maine apni ungli ko dekha jis par bandage bandhi hui thi. Maine use dheere-dheere khola aur use nikaalte hue use kachre ke dibbe me daal diya.
Meri ungli!? Ekdum sahi salamat!
Koi cut nahi. Koi khoon nahi. Ek kharoch bhi nahi.
Kyunki... kabhi koi kharoch thi hi nahi.
Wo bandage?
Sirf ek dikhaava.
Ek jhooth.
Ek test.
Mein library me sirf kitaabein nahi padhta tha. Mein logon ko bhi padhta tha.
Woh chhoti si bandage, jo mushqil se dikhaayi de rahi thi ungli par, jaan-boojh kar lagaayi gayi thi.
Jis bandage ko kisi ne nahi dekha, use usne dekha.
Prerna!!!
Usne ittefaq se nahi dekha. Usne apne lecture ke beech me, earphone lagaaye, screen par nazrein gadaaye hone ke bawajood dekha.
She... was paying attention!!!
Aur, Khushi?
Beshaq! Usne bhi dekha. Lekin, uske liye mehez ye ek ittefaq ho sakta tha. Kyunki, meri ungli chai peete waqt theek uski nazron ke saamne thi.
Sookshm, lekin adrishya nahi.
Aur, usne kya kiya? Prerna ki hi tarah, usne bhi sawal kiya. Lekin, uss se bhi zyada gaur karne waali baat ye thi ki-
Jawaab Prerna ne diya. Jaldi se. Mere bolne se pehle.
Jaise ki woh nahi chaahti thi ki mein aur Khushi baat kare. Aur, iss se mujhe do baatein pata chal chuki thi.
Ek : Woh mujhe qareeb se dekh rahi thi. Harr chhoti-chhoti baat. Yaha tak ki wo cheezein bhi jinhe mein khud kabhi-kabhi andekha kar deta tha.
Do : Woh parvah toh zaroor kar rahi thi.
Kam se kam itna toh zaroor ki woh unn baaton par dhyaan de jo zyadatar log andekha kar dete the.
Aur, yahi main point tha.
Duniya aise logon se bhari padi thi jo baatein to khoob kehte the, magar notice kuchh bhi nahi karte. Mujhe wo log pasand the jo bolne se pehle cheezon par dhyaan dete the.
Ye bandage bas ek chhota sa test tha. Ek test... ye pata lagaane ke liye ki kya Prerna ne jo pyaar ka izhaar kiya, wo waqai sach tha? Ya sirf ek jhooth?
Kyunki, ek pyaar me dooba vyakti, apne partner ki har activity notice karta hai. Uss par dhyaan deta hai.
Meri bauhe kuchh soch sikud gayi. Kyunki, filhaal ke liye-
Prerna iss test me pass ho chuki thi. Khushi bhi. Bhale hi ittefaq se. Magar, ho chuki thi.
Mein apne baaki kaamo me vyast ho gaya, aur uske theek baad Prerna ka message WhatsApp par jhalak utha. Hum derr raat tak ek dusre se baat karte rahe.
Kya waqai... ye pyaar tha? Kya mein aage badh sakta tha? Usne mujhse jawaab maanga tha. Aur, maine samay.
Mujhe jald hi nirnay lena tha. Aur, use jawaab dena tha. Par... Kya waqai mein aur Prerna ek saath? Kahi ye koi library waala timepass toh nahi tha?
Aur, bas isliye maine aaj bandage se use aazmaaya tha. Lekin... uski parvah... mujhe saaf-saaf dikhayi de rahi thi. Ye jhooth nahi tha.
Mein neend ke aaghosh me chala gaya, iss baat se poornta anjaan ki kal ka din mere liye aur bhi chaukaane waala hone waala tha.
.
.
.
.
.
.
.
.
.
Aaj ke liye itna hi guys.
Ye update chhota hai. Around 2.8k words only. But iske updates aise hi rahenge. Kabhi around 4k toh kabhi around 2.5-3k. Kahani ke do updates hi hue hai but kahani me kuchh din beet chuke hai. Around one week. Also, abhi iska maza tab badhega jaise jaise hum plot me aage badhenge. Pichhle update me above 40 likes the. Iss waale me 50 pahucha diyo. Target utna hi rakhte hai. I know you guys will do it. Baaki, jald hi next update aa jaayega. Dates nahi bata sakta. It will be random. Kabhi bhi aa sakta hai update.
Dhanyavad.
- 16,375
- 110,356
- 259
Congratulations for your new story bhai
Congratulations wulfi bro
i love this genre romance.... Very excited for this one specially writing by my favourite one Werewolf bhai .... CongratulationsFor New Story
Congratulationsfor your new story Werewolf bro.
Romance genre is one of my favourites and with your writing skills,I can already tell that this is going to be a great story.
dono stories ek saath chalu rahengi kya?
Ooooo...
Congratulations Sir!
Waise title to bda tagda lag raha hai
Are bilkul... bahut sahi
Aap to bs kuchh bhi le aao hum padh lenge
Baaki har update ka badhiya review dene ki koshish karenge
Bas ju badhiya likha
Kab aayega first update
Katega rachit ka ek dum badhiya walapadhi likhi samajhdar upar se judge banne ki tayyari
Dimaag toh saatwe aasmaan pe hoga
Prerna mein mujhe daayan banne ke saare gun dikh rahe hain
Pehla update ek dum sateek hai
Reader ko bandhne ke liye kahani se
Detailing jo likhe hain miya ufff ufff
Suno sex likhne waale haluo dada ji kaa aake aashirvaad le lo
Wait main bhi toh likhta tha
Nahi pehle likhta tha
Prerna jeene ki prerna khatam kar degi
Khushi jeevan ki khushi kha jaayegi
Ya phir rachit in dono ka bhagya rachega
Intezar rahega agle update ka
Abhi toh yahi lag raha hai rachit ke sath khel khela jaa raha hai woh bhi ek dum gande waala...
Areeee ye kyaaaa... Ek aur new open kar di? Pehle wo to complete kar lo...
Aur ye kya... Incest se seedha romance... Himalaya chale gye the kya shaadi me...??
Interesting
Congratulations for new story bro
but abhi start nahi karun ga..kuch updates aajain then start karun ga..
Aap bohat late updates dete ho..
आखिर इंतज़ार पूरा हुआ, एक नई पटकथा की शुरुआत, ।
आपको ढेरों बढ़ाईयाँ बंधु, और भविष्य के लिए शुभकामनाएं
Thoda aur chalne dete bhai next whooped ke liye content mil jaata
Kya likha hai maza aa gaya.Hum masoomo ko ek ek mahina wait karna padega apko lagta nahi hum bacho ko kuch jyada hi pida dete ho masti kar raha tha please bura mat manna
Update 2
Ahhh the romantic side of werewolf is here ....
Update 2 has been posted guys.